Category: Dhamma Myanmar

ကမ္ဘာမှာအားကောင်းခိုင်မာစွာ ထွန်းကားလာနေပြီဖြစ်သောထေရဝါဒသံဃာနှင့် မြန်မာ့ထေရဝါဒသံဃာတို့ ဘယ်လို update လုပ်၍ညှိုယူကျင့်သုံးကြမည်နည်း

မိမိ၏ဘွဲ့ရပညာတတ်ရဟန်းတစ်ပါးဘဝဖြင့် အနှစ်(၃၀) သာသနာပြုခရီးနှင့်လေ့လာသင်ယူခဲ့မိသော သင်ခန်းစာအချို့

ဖောင်ဒေးရှင်းအလွန်ကောင်းသည့် ထေရဝါဒနှင့် မိမိစိုးရိမ်မိသော ရွှေမြန်မာတို့၏ ခေါက်ရိုးကျိုးနေသော အစဉ်အလာယုံကြည်မှု။ အားလုံးအဆင်ပြေပါစေ။ ကမ္ဘာကြီးနှင့်သဟဇာတဖြစ်ပါစေ။ ၂၁ ရာစုကြီး၏ ကမ္ဘာ့ထေရဝါဒနှင့် update လုပ်ကာ သိက္ခာရှိရှိပူးပေါင်းမိပါစေ။ ဓမ္မအစစ်အမှန်ဖြင့်ငြိမ်းချမ်းမှုအမှန်ရကြပါစေ။ အရာရာတွင်နောက်ကျကျန်ရစ်လေ့ရှိသော မိမိချစ်သော မြန်မာပြည်အတွက် စိုးရိမ်ပူပန်မှုတစ်ခု။

ရဟန်းသံဃာလောကတွင်လည်း ရှေးက ဓမ္မဝိနယကို ဦးထိပ်ပန်ဆင်ကာ သီလသမာဓိပညာ သိက္ခာသုံးပါးကို စင်ကြယ်အောင်အားထုတ်ကြသော်လည်း ယခုအခါတွင်ကား လောကီဘက်တွင် အတွေးအားသန်ကာ Dr ဘွဲ့ PhD ဘွဲ့များကို ပြည်ပတွင် ဝိနည်းပျက်ခံလျှက် လူများနှင့်ရောနှောကာ သွားရောက်သင်ကြားပြီး နိုင်ငံတကာအဆင့်တွင်မဆိုစလောက်မျှအရည်အသွေးဖြင့် သာသနာပြုဟုအမည်ခံကြပြန်၏။ဤသည်လည်းခေတ်အခါအရ အလိုက်လွဲကုန်ကြခြင်းတည်း။

သာသနာကိုနိုင်ငံတကာအဆင့်မီအလေးစားခံရအောင်ကမ္ဘာ့အသိုင်းအဝိုင်းတွင်ဝင်ဆန့်လာအောင်ကား သီလသမာဓိပညာသိက္ခာသုံးပါးကို အဖြူဆုံးအဆင့်ကို အားထုတ်ခြင်းမှတပါးအခြားမရှိပေ။ ယခုအခါအနောက်နိုင်ငံများတွင် သိက္ခာသုံးပါးကိုရိုးသားဖြူစင်စွာအားထုတ်လိုကြသော အားထုတ်ရန်အားသန်ယုံကြည်ကြသော ဘိက္ခုဗောဓိကဲ့သို့သော ပါဠိကျမ်းတတ် သူရဲ့လူ့ဘဝကရခဲ့ပြီးဖြစ်သော PhD ဘွဲ့ကိုစွန့်လွှတ်ကာ ရဟန်းခံလာပြီး သာသနာ့တာဝန်ဆောင်အများအပြားပေါ်ထွန်းလာခဲ့ပေပြီ။

မြန်မာသံဃာတော်များက ရဟန်းအဖြစ်ခံယူပြီးကာမှ Dr ဘွဲ့ PhD ဘွဲ့စသည်တို့အတွက်အားထုတ်ခြင်းသည်လည်း နောက်ကျခြင်းသာမက ပြောင်းပြန်ပင်ဖြစ်နေပြန်သေး၏။ အင်္ဂလိပ်စာအင်္ဂလိပ်စကားကိုကား တကယ့်ကိုတတ်ကျွမ်းအောင်အားထုတ်ဖို့လိုကိုလိုအပ်ပါသည်။မတတ်လျှင်လည်းမပူပါနှင့် တကယ်တရားစစ်လာရင် ဘာသာပြန်ပေးမည့်သူအလိုလိုပေါ်လာပေလိမ့်မည်။ (ဝေဘူဆရာတော်ကိုကြည့်)။

မိမိတရုတ်ပြည်ပီကင်းသွားစဉ်က မိမိတရုတ်စကားမတတ်ပါ။ သို့သော်သူတို့ဓမ္မကိုအမှန်တကယ်နာယူကျင့်ကြံလိုသောအခါ သူတို့တွေဘာသာပြန်ပေးမည့်သူကို ရအောင်ရှာပေး၍ နာယူအားထုတ်ကြသည်ကိုကိုယ့်တွေ့ဖြစ်ပါသည်။ အင်္ဂလိပ်စာအင်္ဂလိပ်စကားတတ်ဖို့ ဓမ္မကိုအိုင်းစတိုင်းတို့ ပြောဆိုသလိုပ္ပံနည်းကျကျင့်သုံးဖို့သည်ကားလိုအပ်ပေ၏။ ဤကား “သတိပဋ္ဌာန်အခြေခံသောဝိပဿနာ”ကို လက်တွေ့ကျင့်သုံးဖို့မှတပါးအခြားနည်းမရှိပေ။ မိမိ၏တပည့်များအား မိမိဤသို့သြဝါဒပေး၏။

သို့သော် မိမိ၏တပည့်အများအပြားပင် ပြည်ပထွက်ကာ Dr ဘွဲ့ PhD ဘွဲ့များကိုယူထားပြီးသူများရှိပေ၏။ ထိုဘွဲ့များကိုယူရန်လည်းတက္ကသိုလ်အသီးသီးတွင်သင်ယူနေကြဆဲလည်းရှိနေပေ၏။ သို့သော်နိုင်ငံတကာအဆင့်အတန်းဝင်အောင်ကား မစွမ်းနိုင်ကြသေးသည်ကို တွေ့နေရပေသေး၏။ ပြည်တွင်းတွင် ယခုလက်ရှိမိမိလေးစားမိသော ဆရာတော်ကြီးကား ဆရာတော်ကြီးအရှင်ဉာဏိဿရဖြစ်ပေ၏။ ရှင်ငယ်ရဟန်းငယ်များ အတုယူစံထားထိုက်၏။

မိမိသည်ကား တောရဝိနည်းဝိပဿနာသာသနာတော်ကို ပိုမြတ်နိုး၍ မိမိလေးစားကြည်ညိုရသော ကျေးဇူးရှင်မဟာဂန္ဓာရုံဆရာတော်ဘုရားကြီး အရှင်ဇနကာဘိဝံသအားဦးထိပ်ထားလျှက် နိုင်ငံတကာအဆင့်မီ ပရိယတ်ပဋိပတ်ကိုလုံးဝဥဿုံအခြေခံသည့်တောရသာသနာတစ်ခုဖြစ်လာအောင် ရိုးသားစွာကြိုးစားနေဆဲတည်း။ ဖြစ်သလောက်ဖြစ်လာနေသည့်တိုင်အောင် အားရမှုမရှိလှသေးပေ။

မိမိခံစားနေရသည်ကား မြန်မာတို့သည် ဒေါင်းတစ်ကောင်မျှားတစ်စင်းနေထိုင်တတ်၏။ အပေါ်ယံ၌ ပြုံးပြနှုတ်ဆက်နေသည့်တိုင်အောင် အနှစ်သာရအားဖြင့်စည်းလုံးညီညွတ်မှုနည်း၏။ မကျေနပ်လျှင် ညှိုနှိုင်းအဖြေရှာကြရမည့်အစား စိတ်ခံစားမှုအရခွဲထွက်ကာ “ငါလည်းလုပ်တတ်ပါတယ်”ဟူသောမာနဖြင့် တစ်စင်ထောင်တတ်၏။ ထို့ကြောင့် အဖွဲ့အစည်းတိုင်းသည် ကျစ်လစ်သိပ်သည်းမှုအတွက် အာမခံချက်မရှိပေ။ အင်အားချိနဲ့ကာ ပန်းတိုင်မှာမှိန်လာပြီး အလှမ်းဝေး၍ဝေး၍သွားလေတော့၏။ ဤကားယနေ့အထိအရာရာနောက်ကျကျန်နေရခြင်း၏ပြယုဂ်ထဲမှတစ်ခုဖြစ်ပေ၏။

ဤကားမြန်မာတို့ကြားဝယ်အမှန်တကယ် ဖြစ်နေသောအခြေအနေတစ်ခုဖြစ်ပေ၏။ ထို့ကြောင့်ပန်းတိုင်ကောင်း ခေါင်းဆောင်ကောင်းရှိသော်လည်း ပန်းတိုင်ရောက်အောင် နှစ်ပေါင်းများစွာယက်ကန်ကန်ဖြင့်လှော်ခတ်နေကြရသည်ကားယနေ့အချိန်အထိပင်ဖြစ်လေတော့၏။

Personal နှင့် professional နှစ်ခုကို မခွဲခြားတတ်ကြဘဲ ရောထွေးရှုမြင်ကာ “ရေအိုးဖင်ပေးအေးအေးနေမည်”ဟူသောအယူအဆဖြင့် အပြင်ထွက်ထိုင်ကာ လုပ်ချင်ရာလုပ်၍ အဖွဲ့အစည်းပျက်သွားသည်ကိုပင် “ငါမပါလို့”ဟူသော အယူအဆဖြင့်ဝမ်းသာနေတတ်သည်အထိ အတွေးအခေါ်တို့နိမ့်ကျသွားသူများပင်ရှိလာပေတော့၏။

အဓိကအားနည်းချက်ကြီးသည်ကား နိုင်ငံတကာအဆင့်အတန်းရှိက္ခာရှိသော အဖွဲ့အစည်းများဖြင့်ပူးပေါင်းဆောင်မှုအလေ့အထမရှိခြင်းပင်တည်း။

အခြေခံစာသင်ကျောင်းမှာကတည်းက နိုင်ငံတကာအဆင့်အတန်းဝင်အောင်မိမိတို့၏ ကျောင်းသူကျောင်းသားများကို နိုင်ငံတကာအဆင့်အတန်းရှိသိက္ခာရှိပရဟိတအဖွဲ့အစည်းများ ငြိမ်ချမ်းစွာပြဿနာဖြေရှင်းရေး ငြိမ်းချမ်းစွာအတူတကွနေထိုင်နိုင်ရေး စည်းလုံးညီညွတ်စွာတရားနည်းကျကျ ပြဿနာကို မျက်နှာချင်းဆိုင်ဆွေးနွေးဖြေရှင်းလျှက် ဂုဏ်သိက္ခာရှိစွာနေထိုင်တတ်အောင် အလေ့အကျင့်ကောင်းများဖြင့်နိုင်ငံတကာစံချိန်မီအောင်လေ့ကျင့်ပျိုးထောင်ပေးရေးတို့သည်မဖြစ်မနေလိုအပ်လှပေ၏။ ထိုကဲ့သို့သောအတွေ့အကြုံကောင်းများရှိထားသည့် ဆရာဆရာမများကသင်ကြားလေ့လ့ကျင့်ပေးလျှင်လည်းဖြစ်နိုင်ပေ၏။

(မနေ့ကလိုင်းပေါ်မှာ တကွဲတပြားပြောခဲ့တဲ့ Dhamma talk နားယူချင်သူများ တစ်ပေါင်းတည်းနာယူနိုင်ရန်စုပေါင်း၍ပြန်တင်ပေးလိုက်သည်။)

ကျောင်းသားနှင့်လူငယ်များအတွက်

ကျောင်းအုပ်ဆရာဆရာမကြီးများ ဆရာဆရာမများ ရပ်မိရပ်ဖများ ကျောင်းသားမိဘများနှင့် ပြည်တွင်းပြည်ပသာသနာ့ဝန်ထမ်းအမြင်ကျယ်သော ဘုန်းတော်ကြီးများ ပူးပေါင်းမိက ကလေးများပညာရေး အလွန်ကောင်းစရာရှိ၏။ အမှန်ဆိုရသော်ကျောင်းသားလူငယ်များသည် အနာဂတ်၏မျော်လင့်ချက်ရောင်ကြည်များတည်း။ သူတို့တွေကို အယူအဆတစ်ခုတည်းမှာလှောင်ပိတ်မထားဘဲ ဝေဖန်ပိုင်းခြားတတ်တဲ့အသိဉာဏ်အမြင်ရအောင်သာ လေ့ကျင့်ပျိုးထောင်ပေးသင့်ပေ၏။

လူငယ်များ ဘာပိုက်ဆံမျှမကုန်စေဘဲ မိမိအသိဉာဏ်နှင့်အချိန်ကိုသာ အသုံးချတတ်မယ်ဆိုရင် အင်္ဂလိပ်စာအင်္ဂလိပ်စကား ကောင်းကောင်းတတ်နိုင်သည်ကိုအထူးသတိပြုသင့်ပေ၏။ ထို့ကြောင့်အချိန်မီတတ်လာအောင်ကြိုးစားကြပါဟုတိုက်တွန်းချင်၏။ အင်္ဂလိပ်စာစကားဟုပြောဆိုမိတိုင်း နိုင်ငံတကာဟူသောဝေါဟာရကပါလာတတ်ပေ၏။

ဓမ္မဝိနယဘက်မှာလည်းဖွံ့ဖြို့ဖို့လိုပါပြီ (Line Walker 2 ရုပ်ရှင်ရိုက်ကွင်းမှရခဲ့သောသင်္ခန်းစာကို သင်ယူကာ သာသနာဘက်နှင့် ဆက်စပ်ကြည့်မိခြင်း)

ဓမ္မဘက်မှာလည်း ခေါင်တုံးသင်္ကန်းဝတ်ထားရုံမျှဖြင့် မပြီးသေးပါဘူး။ ဝိနည်းကိုတကယ်လေးစားပြီး ကိလေသာအရိပ်အငွေ့ကင်းစင်အောင် ဝိပဿနာကို professionally အားထုတ်ထားဖို့လိုအပ်ပါတယ်။ အနောက်တိုင်းနိုင်ငံကကိုယ်တော်တွေ တကယ်ကျင့်ပြီးရောက်ရောက်လာမှ နောင်တသံဝေဂရနေလို့မဖြစ်ပါဘူး။ တချို့ကမြန်မာစိတ်နဲ့ကိုယ်တိုင်အားမထုတ်ဘဲ သူများကိုသာစာကျက်ဟောဖို့အားထုတ်နေတာကိုယ်တွေ့ပါ။ ရှက်စရာပါ။ ဟိုဘက်ကလူတွေက အထင်မကြီးပါဘူး။ အဲဒီလိုမျိုးက ကိုယ့်အနားပင်အချို့ရှိနေ၍ စိတ်မကောင်းပါ။ မြန်မာကိုဘယ်လို update လုပ်ရမယ်လို့ကိုစဉ်းစားရခက်နေပါတယ်။ တစ်အုံလုံးကိုတာဝန်သိစိတ်တွေနဲ့ လူမျိုးကြီးစိတ်မွေးပြီး သက်ဆိုင်သူတွေစုပေါင်းပြီး နေရာဌာနတိုင်းမှာသတ္တိရှိရှိပြုပြင်ဖို့လိုနေတာပါ။

ဓမ္မဝိနယကိုလည်း ကိုယ်ကလက်တွေ့အားမထုတ်မကျင့်ကြံဘဲ အနောက်နိုင်ငံကလက်တွေ့သမားပညာရှင်တွေကို သင်ပြဖို့ဆိုတာ မိနစ်ပိုင်းမျှမှာဖြစ်နိုင်ပေမဲ့ အချိန်ကြာလာတာနဲ့အမျှ ပြဿနာတွေရှိလာနိုင်ပါတယ်။ ပေါ့ပေါ့တန်တန် အပြီးစလွယ်စိတ်မထားသင့်ပါဘူး။ အရည်အသွေးအမှန်မရှိဘဲ well-trained and qualified professional မဖြစ်ဘဲဆိုရင်တော့ တရားစခန်းဖွင့်ပြသပေးဖို့ဆိုတာမျိုးဟာ အတော်အလှန်းဝေးပြီး မဖြစ်နိုင်ပါဘူး။ အဲဒီကိစ္စမျိုးမှာအနောက်နိုင်ငံပညာတတ်အသိုင်းအဝိုင်းကိုသွားပြီးမိဖျန်းမိရင် မြန်မာကိုအထင်သေးခံရဖွယ်ရှိ၍ အတော်စိတ်ပျက်ပါတယ်။

မိမိသည်မိမိ၏ကိုယ်ပိုင်အစွမ်းအစဖြင့် ပြည်ပသို့ထွက်၍တရားပြပေးနေသော မြန်မာထဲကမြန်မာဘုန်းကြီးတစ်ပါးဖြစ်ပါတယ်။ မိမိတို့မြန်မာ့စိတ်နေစိတ်ထား လက်တွေ့သုတေသနအားနည်းပုံ ပရိတ်သတ်ကြိုက်ကြိုက်မကြိုက်ကြိုက်ဟောပြီးထပြန်သာဓုခေါ်သံအလိုလိုကြားရသော တရားဟောစနစ်စသည်တို့ကိုသိနေ၍ နိုင်ငံတကာအဆင့်တွင် ဤသို့ဤပုံမျိုးတရားဟောရန်မလွယ်ကူပုံကိုသိစေချင်ပါတယ်။ ပေါ့ပေါ့နေ၍မရပါ။

ဝိနည်းအရငွေမကိုင်ဘူးဆိုရင် တကယ်မကိုင်ပါနှင့် မလိမ်ညာမဖြီးဖျန်းပါနှင့် ဗုဒ္ဓဓမ္မကိုထဲထဲဝင်ဝင်လေ့လာသင်ယူနေကြသော အချို့ဥရောပအမေရိကမှဓမ္မချစ်ခင်သူများဟာဝိနည်းကိုနားလည်နေကြပါပြီ။ ရွှေမြန်မာနိုင်ငံထဲမှာ ရွှေတန်အောင်အားနာသည်းခံတတ်သော ရွှေမြန်မာတို့ကိုဖြီးဖျန်းလို့ရပေမဲ့ တိုးတက်ဖွံ့ဖြိုးပြီးသောဟိုဘက်ကလက်တွေ့သမားပညာတတ်ပညာရှင်များသည်ကား လက်ခံမည်မဟုတ်ပါ။ မလိုလား၍လက်မခံခြင်းမုန်း၍လက်မခံခြင်းမဟုတ်ပါ။ အခြေအမြစ်ကျသော ပညာစစ်စစ်ကိုလိုလား၍သာ ဖြီးမှုဖျန်းမှုကိုလက်မခံခြင်းဖြစ်ပါတယ်။

ထိုကဲ့သို့ပြည်တွင်းတွင်ပေါ့ပေါ့ပါးတရားကိုဟော အလိုလိုသာဓုခေါ်သံကြားရတတ်တဲ့နိုင်မှာ ရက်ရောတဲ့အလှူပေါင်းစုံဖြင့်ဇိမ်ရှိရှိနေထိုင်ကာ ပေါ့ပေါ့ပါးပါး ဖြီးဖျန်းပြီးပေါ့ပေါ့နေခဲ့လို့ တကယ့် quality ကို well-trained မလုပ်ခဲ့လို့ အခုရုပ်ရှင်သရုပ်ဆောင်ဘက်မှာလည်း ဟောင်ကောင်လိုနိုင်ငံလေးငယ်ပေမဲ့ well-trained and qualified professional တွေရောက်လာတဲ့အခါ ရက်ပိုင်းအတွင်းမှာပဲ ဗလာဗလာတွေများစွာထွက်ပေါ်လာတာကို စိတ်မကောင်းစွာတွေ့ရပါတယ်။

တရားရေးမှာလည်း နိရောဓသစ္စာဖြစ်တဲ့နိဗ္ဗာကိုပင်အနည်းဆုံးအဆင့်ကိုယ့်ဉာဏ်နှင့်ကိုယ်သိနေအောင် ဝိပဿနာကိုအသေအချာအားထုတ်ထားသင့်ပါတယ်။ ဇိမ်နဲ့အိပ်ဇိမ်နဲ့စား ရွှေတန်အောင်သည်းခံတတ်တဲ့ ရွှေမြန်မာဒါယကာတွေနှင့်နေထိုင်ကာ ပြည်တွင်းမှာ သူတို့တွေရဲ့မေတ္တာကြောင့် မြန်မာအချင်းချင်းမှာသာ ဖြီးချင်ဖြီးချင်လို့ရပေမဲ့ နိုင်ငံတကာအဆင့်မှာ မြန်မာတွေးမြန်မာခေါ်နှင့် သွားမလုပ်မိကြစေဖို့ သတိပေးလိုက်ပါရစေ။

တကယ့်ကိုနိုင်ငံတကာအတွေးအခေါ်နှင့်သာ ဓမ္မဝိနယအစစ်အမှန်ကိုကျင့်ကြံတွေးခေါ်ပြောဆိုဖို့ အလုပ်လုပ်ဖို့စိတ်ကူးကြပါလို့ ကိုယ်တွေ့နှင့်နှိုင်းယှဉ်ကာ တိုက်တွန်းလိုက်ပါရစေ။ နှိုက်နှိုက်ချွတ်မေးတာဖြေတာကို နှိုက်နှိုက်ချွတ်ချွတ်စိတ်ရှည်လက်ရှည်အဖြေပေးနိုင်အောင်ကြိုးစားထားကြပါလို့လည်းထပ်မံတိုက်တွန်းလိုက်ပါရစေ။

ဟောင်ကောင်လိုနိုင်ငံငယ်လေးက well-trained and qualified professional တွေရောက်လာတော့မှ ခြေမကိုင်မိလက်မကိုင်မိ ဗလာဗလာပြောဆိုနေကြတာမျိုးကို ထေရဝါဒသာသနာအား ပိဋကသုံးပုံနှုတ်ငုံဆောင်နိုင်လောက်အောင် ချစ်ခင်မြတ်နိုးစွာ ထိမ်းသိမ်းနိုင်စွမ်းရှိတဲ့ မြန်မာ့သံဃာ့အသိုင်းအဝိုင်းမှာလည်း မဖြစ်စေလိုပါ။ ထိုအခါကြမှ “သာကီမျိုးဟေ့ဒို့ဗမာ ပြည်ပသံဃာအလိုမရှိ ပြည်ပဗုဒ္ဓဘာသာအလိုမရှိ ပြည်ပဗုဒ္ဓဘာသာ မောင်းထုတ်မောင်းထုတ်”စသည် အော်နေ၍မရပါ။

နိုင်ငံတကာမှာ တရားတစ်ပွဲဆုံးသည်နှင့် သာဓုခေါ်သံအလိုလိုကြားရမည် မဟုတ်ပါကြောင်း။ ကမ္ဗောဒီးယားလိုနိုင်ငံမျိုးမှာပင် တရားပွဲဆုံးသည်နှင့် အလိုလိုကြားရသောသာဓုခေါ်သံမရှိပါကြောင်း။ တကယ်အားထုတ်ကြပါ။ တကယ်ကျင့်ကြပါ။ သိပ္ပံနည်းကျတဲ့ ဗုဒ္ဓဓမ္မကို လက်တွေ့စာတွေ့ကိုက်ညီအောင် ကျင့်ကြံအားထုတ်ကြပါလို့ တိုက်တွန်းလိုက်ပါရစေ။ အပ္ပမာဒေန သမ္ပာဒေထ။

ဒါလေးကိုလည်းကြုံကြိုက်တုံးမှတ်သားကြပါ
“ပရိယတ်ပဋိပတ် ဤနှစ်ရပ် သေချာပေါင်းစပ်ပါ။
အချီုးညီစွာ ပေါင်းစပ်ပါမှ ပဋိဝေဒ ပေါ်ရမည်မှတ်ပါ။
သိပ္ပံနည်းကျ လမ်းညွှန်ပြ ဗုဒ္ဓသာသနာ။
လေးစားဦးခိုက် ရိုသေထိုက် စိတ်မိုက်ပြုပြင်ရာ။
ဒိဋ္ဌိအကြိုက် အယူမိုက် အပါယ်ဆိုက်လေရာ။
ဒိဋ္ဌိကွာချင် ဝိပဿနာသင် လျှင်လျှင်ကျင့်ကြံပါ”။

မေတ္တာဘာဝနာ သိပ္ပံပညာနှင့် လူသားများ၏နေ့စဉ်ဘဝ ဆက်စပ်လာပုံ

အိမ်မှာမိသားစုစားဝတ်နေရေးဖြေရှင်းဖို့ တနိုင်တပိုင်အိမ်ဆိုင်ဖွင့်ထားသူ ဈေးကူရောင်းဖို့ဝန်ထမ်းရှာမရတာ၊ တနိုင်တပိုင်အထည်ဆိုင်လေးတွေ ဝန်ထမ်းရဖို့မလွယ်တာ တနိုင်တပိုင်တောင်သူလုပ်ငန်းတွေမှာ ဝန်ထမ်းတွေရဖို့ခက်ခဲနေတာ တစ်ခုခုကတော့ ချွတ်ယွင်းနေတာအမှန်ပဲ။ အချို့ဆိုနှစ်ပေါင်းများစွာလုပ်စားနေတာကိုယ်တွေ့ပါ။ ဒါတွေဟာဘာကြောင့်ဖြစ်နေတာလဲ။

သေချာတာကတော့ နေရာတိုင်းမှာအဆင်မပြေမှုတွေရှိနေတာအမှန်။ နိုင်ငံရေးကြောင့်လား။ စီးပွားရေးကြောင့်လား။ ပညာရေးကြောင့်လား။ အစွမ်းအစမရှိကြလို့လား။ ညည်းညူသံတွေကြားရတိုင်းစိတ်မချမ်းသာဘူး။ နှစ်ပေါင်း ၃၀ ကျော်လောက် ဓမ္မဝိနယနှင့်အညီ သာသနာ့တာဝန်ထမ်းဆောင်လာခဲ့တဲ့ သက်တော် ၅၄ နှစ်ရှိနေပြီဖြစ်တဲ့ ငွေလည်းမကိုင်ဘဲကိုယ့်ဆွမ်းကိုယ်ခံစားနေတဲ့ ဆရာတော်တစ်ပါးအနေနဲ့ကတော့ ပြေလည်ကြပါစေလို့မေတ္တာပို့သပေးနေရုံမှတပါး ဘာမျှလုပ်မပေးနိုင်တာအတွက်စိတ်မကောင်းဖြစ်ပါတယ်။

မနက်ကို ၃ နာရီမှ ၅ နာရီအထိတရားထိုင်ပါတယ်။ ရှေ့တစ်နာရီက ကိုယ့်အတွက် “ကိလေသေ ဘိန္ဒတီတိ ဘိက္ခု” “သံသာရေ ဘယံ ဣက္ခတီတိ ဘိက္ခု”ဟူသော အဓိပ္ပါယ်ဖွင့်ဆိုချက်များနှင့်အညီ ကိလေသာကင်းစင်ရေး စိတ်သန့်စင်ရေး ခုခေတ်သိပ္ပံနည်းကျဝေါဟာရများနှင့်ဆီလျှော်အောင်ပြောရမည်ဆိုက စိတ်သည် ဦးနှောက်နှင့်ဆက်သွယ်မိတဲ့အခါ ရှင်းလင်းစွာဆက်သွယ်နိုင်ရေး တရားနှင့်ပတ်သက်လာလျှင်ကိုယ်နှင့်အသက်ကိုပါမငဲ့မကွက်အားထုတ်နိုင်ရေးတို့အတွက် စိတ်ကိုအပြင်ထွက်ခွင့်မပေးဘဲအားထုတ်ရပါတယ်။

နောက်တစ်နာရီကတော့ ပြည်တွင်းမှမိမိနှင့်အနီးစပ်ဆုံး တပည့်ဒါယကာများမှသည် တစ်နိုင်ငံလုံးအထိ၊ ပြည်ပတွင်လည်းမိမိရောက်ခဲ့သော နိုင်ငံများမှအနီးဆုံးကူညီလှူဒါန်းတရားစခန်းတွေဖြစ်ပေါ်အောင်အားထုတ်ပေးကြသည့် ကလျာဏမိတ္တသူတော်ကောင်းများနှင့် အနီးကပ်သင်ပြပေးသည့်အတိုင်း စနစ်တကျစိတ်ပါလက်ပါ အားထုတ်ခဲ့ကြသော ယောဂီများမှသည် တစ်ကမ္ဘာလုံးအထိ မေတ္တာပို့သရသော မေတ္တာဘာဝနာအလုပ်ကိုအားထုတ်ရပါတယ်။ ပြီးတော့မှသာ ကိုယ်ရေးချင်သော၊ စာဖတ်သေူများအားတရားနှင့်အားအင်ဖြစ်စေမည့် ဖတ်လိုက်ရင်းပင် အားတက်စေမည်ဖြစ်သော တရားစာသားများကိုရေးလေ့ရှိပါတယ်။

မေတ္တာဘာဝနာကတော့အထူးကိုအားထုတ်ရပါတယ်။ ဒါယကာတစ်ဦးစီတစ်မိသားစုချင်းစီရဲ့မျက်နှာတွေကို စိတ်နဲ့မြင်အောင်အာရုံပြုစေ့စေ့ကြည့်ပြီးအအေးဓာတ်များရအောင်ပို့သရပါတယ်။ ဒါကိုလည်း ခုခေတ်သိပ္ပံက စမ်းသပ်ထားပြီးသားပါ။ မေတ္တာပို့သတဲ့ sender နဲ့ မေတ္တာအပို့ခံရသူ receiver တို့ကို တစ်ခန်းစီခြားထားပြီး neuroscientist တစ်ယောက်က သိပ္ပံနည်းကျ ECG မှာစောင့်ကြည့်သလို စောင့်ကြည့်စမ်းသပ်ပါတယ်။ sender ဆီက energy ဟာ receiver ဆီကိုသွားသလို receiver ကလည်း အဲဒီ energy ကို လက်ခံရရှိတယ်ဆိုတာကို သိပ္ပံနည်းကျ စမ်းသပ်ထားပြီးသားပါ။

ဒါကြောင့် မိမိတို့ရဲ့အိပ်ယာထထချင်း ပထမဆုံးနာရီတွေမှာ ဘုန်းဘုန်းရဲ့ ဖြူစင်တဲ့စိတ်နဲ့ ပို့သတဲ့မေတ္တာကိုခံယူရရှိလိုသူတွေဟာ မနက် ၄ နာရီမှ ၅ နာရီကြားကို တစ်ချက်လောက်ပဲ ဘုန်းဘုန်းရှိတဲ့နေရာနဲ့ဘုန်းဘုန်းပုံရိပ်ကို လက်အုပ်လေးချီပြီးသံဃာ့ဂုဏ်တော် ၉ ပါးနဲ့ သီလသမာဓိပညာအရည်အသွေးကို မိမိမြင်နိုင်သလောက်ဉာဏ်မီသလောက် မျက်စိဖွဖွမှိတ်၍ လက်အုပ်ချီအာရုံပြုလျှက် ဖြူစင်သော receiver တစ်ခုအဖြစ်နေပေးပါ။ ဘုန်းဘုန်းဆီက မေတ္တာ energy ဟာ ECG မှာ လိုလှုပ်ရှားပြီးသင်တို့တစ်ယောက်စီထံသို့ရောက်လာကာ သင်တို့၏တစ်နေ့တာအတွက် ကျန်းမာချမ်းသာ ဘေးရန်များကင်းကွာလျှက် အခက်အခဲတွေကိုကျော်လွှားနိုင်မည်ဖြစ်ပါကြောင်း သိပ္ပံနည်းကျသတိပေးလိုက်ပါရစေ။

ရဟန်းဘဝဖြင့်ယနေ့အထိ နှစ်ပေါင်းသုံးဆယ်လောက် အားထုတ်ထားသောသီလသမာဓိပညာစွမ်းအားဖြင့်ပို့လွှတ်ပေးသော မေတ္တာ energy စွမ်းအားတို့ဟာ သင်တို့၏ဘဝအတွက် တစ်စုံတရာအတိုင်းအတာတစ်ခုအထိ ထိရောက်နိုင်ဘွယ်ရှိပါကြောင်း။

မှတ်ချက်။ ။ မိမိအပေါ်အမြင်မှားယွင်းကာ ဒေါသအာဃာတရှိနေသူများအားလည်း ကြီးသောငယ်သောမခွဲခြား ရဟန်းပဲလူပဲမခွဲခြား မိမိမေတ္တာပို့ချိန်တွင် လုံးဝဥဿုံမိမိခွင့်လွှတ်ထားသည်ကို သစ္စာပြုပြီးမှ မေတ္တာပို့သပါကြောင်း။ ဗုဒ္ဓအပေါ်အမြင်မားယွင်းလျက် တိုက်ခိုက်ရန် မလျှော်ကံစွာ ကြံစည်အားထုတ်နေသော နာဠာဂီရိဆင် အင်္ဂလိမာလ ဒေဝဒတ်တို့ပင် မေတ္တာစစ်ကို ခံယူရရှိနိုင်ကြပေသေး၏ဟု နှလုံးမူကာ ထို နံနက် ၄ နာရီမှ ၅ နာရီအထိ အချိန်လေးဝယ် receiver ကောင်းတစ်ယောက်အဖြစ်နေထိုင်ပေးရန်မမေ့ဖို့သတိပေးလိုက်ပါရစေ။ သင်တို့တို့၏ နေ့စဉ်ဘဝအတွက်ဘုန်းဘုန်း၏ဖြူစင်သောမေတ္တာသည် အစွမ်းကောင်းသောအားဆေးတစ်လက်အဖြစ်တော့ ပံ့ပိုးပေးနိုင်မှာပါလို့ယုံကြည်မိပါကြောင်း။ ခု ၅၄ နှစ်အရွယ်တွယ် “ငါသည်အလုပ်လည်းလုပ်ရင်း သေဖို့လည်းပြင်တော့မည်”ဟု အဓိဋ္ဌာန်ဖြင့်ကြိုးစားနေပါကြောင်း။

မေတ္တာအားကြီးစွာဖြင့်
သင်တို့အားအမြဲမေတ္တာထားနေမည့်
ဘုန်းဘုန်း။

မေး။ ။ အရှင်ဘုရား–လမ်းလျှောက်၍ မေတ္တာပို့လို့ရရဲ့လားဘုရား? တပလ္လင်ခွေထိုင်ပြီးတော့ပဲမေတ္တာပို့ရမှာလား?

Q: Venerable Sir, can we do loving-kindness meditation Mettāhhāvanā by walking or just in sitting posture?

အဖြေ။ ။ကျမ်းဂန်နဲ့ညှိုကြည့်ရအောင်နော်။ ကျမ်းဂန်နှင့်ညှိုရင် အဖြေထွက်လာမှာပါ။