Category: Dhamma Myanmar
Dhamma Text – Myanmar
ဆိုခဲ့ပြီးသော မေးခွန်း ၁၄ ခုကို အောင်မြင်ပြီးနောက် လုပ်ထုံးလုပ်နည်း
ဆိုခဲ့ပြီးသော မေးခွန်း ၁၄ ခုကို အောင်မြင်ပြီးနောက် လုပ်ထုံးလုပ်နည်း
==============================================
ရဟန်းလောင်းရှင်သာမဏေသည် ဆိုခဲ့ပြီးသော မေးခွန်း ၁၄ ခုကို အောင်မြင်ခဲ့သော် မြင့်မြတ်သောရဟန်းအဖြစ်ကို ရောက်စေနိုင်သော ဥပသမ္ပဒကံဆောင်ရာ သိမ်ထဲတွင် သံဃာ ၅ ပါးနှင့် ၅ ပါးအထက် စုဝေးနေကြရာသို့ လက်အုပ်ချီကာ ရိုသေစွာ ဝင်ရောက်ထိုင်နေရပါသည်။
ထိုသိမ်ထဲတွင် ဥပသမ္ပဒကံဆောင်ရန်ရောက်နေကြသော စုဝေးရောက်ရှိနေကြသော သံဃာသည်လည်း အနည်းဆုံး ၅ ပါးရှိရပါမည်။ ငါးပါးထက်လျှော့နေလျှင်လည်း ရဟန်းအဖြစ်ကိုပြုပေးသော ဥပသမ္ပဒကံကို ဆောင်ခွင့်မရှိပေ။ ထို့ကြောင့် ဥပသမ္ပဒကံဆောင်ရန် သိမ်ထဲတွင် သံဃာ ၅ ပါးနှင့် ၅ ပါးအထက် ညီညွတ်စွာစုဝေးရောက်ရှိနေရပါမည်။
ဥပသမ္ပဒကံဆောင်ရာ ထိုအချိန်၌အထူးရေးကြီးသော လုပ်ထုံးလုပ်နည်းဖြစ်သောကြောင့် ရဟန်းသံဃာသည်လည်း ထိုင်ချင်သလိုထိုင်ခွင့်မရှိပါ။ တစ်ပါးနှင့်တစ်ပါး နှစ်တောင့်ထွာ ဟတ္ထပါသ်အတွင်းသာထိစပ်၍ထိုင်ရပါသည်။ ဤအချိန်၌ ဤနှစ်ထောင့်ထွာ ဟတ္ထပါသ်အတွင်း လူဝတ်ကြောင်သာမဏေများ ဝင်ရောက်ခွင့်မရှိပါ။
ရဟန်းသံဃာသည်လည်း သိမ်ထဲတွင်စုဝေးပြီး သံဃာသာလျှင် သိမ်ထဲ၌ရှိနေရပါမည်။ ကံဆောင်နေစဉ်၌ အခြားသံဃာသည် သိမ်နယ်နိမိတ်အတွင်းသို့ ဝင်ရောက်ခွင့်မရှိပါ။ ထို့သို့မဝင်နိုင်စေရန်လည်း ရဟန်းခံပြုလုပ်မည့် ကျောင်းတိုက်တွင် ဥပသမ္ပဒကံမဆောင်မီကတည်းက ဤယနေ့ မည့်သည့်နာရီမည်သည့်အချိန်တွင် မည်သည့်သိမ်တွင် ဥပသမ္ပဒကံဆောင်ရန် ရှိပါကြောင်း အသိပေးပန်ကြားထားရပေ၏။
ထိုဥပသမ္ပဒကံပြုရာ သိမ်နယ်နိမိတ်တွင်လည်း သေချာအောင် ရှင်သာမနေများအား အစောင်းထား၍ စောင့်ရှောက်ရပေ၏။ အကယ်၍ ဥပသမ္မဒကံပြုနေစဉ် သံဃာတစ်ပါးသည် အမှုမဲ့အမှတ်မဲ့ သိမ်နယ်နိမိတ်အတွင်းဖြတ်သွားမိက ဖြတ်သွားသော ထိုသံဃာသည် နှစ်တောင့်ထွာဟတ္ထပါသ်မှ အလွတ်ဖြစ်နေသောကြောင့် ဥပသမ္ပဒကံပျက်လေတော့၏။
သိမ်ထဲမှာ နှစ်တောင့်ထွာဟတ္ထပါသ်စပ်၍ထိုင်ကာ ကံပြုနေကြသော သံဃာသည် ဉတ္တိစတုတ္ထကမ္မဝါစာဖတ်၍ ကံပြန်ပြုကြရပေ၏။ ထို့ကြောင့် မိမိတို့မဟာဂန္ဓာရုံ၌ ရဟန်းခံအခန်းအနားရှိရာတွင် သိမ်နယ်နိမိတ်ပါတ်ဝန်းကျင်၌ တတ်သိနားလည်သော ကိုရင်များကို အစောင့်ချပြီးမှ ဥပသမ္ပဒကံပြုလေ့ရှိပေ၏။
ဆိုခဲ့သည့်အတိုင်း ၁။ သံဃာ ၅ ပါးနှင့် ၅ ပါးအထက် သတ်မှတ်ထားသော ခန္ဓသိမ်ထဲတွင် စုဝေးမိခြင်း၊ ၂။ ရဟန်းလောင်းရှင်သာမနေသည် ဆိုခဲ့ပြီးသောမေးခွန်း ၁၄ ခုကို အောင်မြင်ခဲ့ခြင်း၊ ၃။ သတ်မှတ်ထားသော ခန္ဓသိမ်ထဲတွင် သံဃာသည် နှစ်တောင့်ထွာ ဟတ္ထပါသ်အတွင်းစုဝေးမိခြင်း၊ ၄။ တတ်သိနားလည်သောရှင်သာမနေများအား သိမ်နယ်နိမိတ်အပြင်၌ အစောင့်ချထားပြီးခြင်း၊ ဤလေးချက်နှင့်ပြည့်စုံလျှင် ရဟန်းလောင်းရှင်သာမဏေအား ဥပသမ္ပဒကံဆောင်ရန် သံထဲမှကံဆောင်သံဃာသည် ဉတ္တိစတုတ္ထကံမဝါစာကို ဖတ်၍ရပေပြီ။
ရဟန်းလောင်းရှင်သာမဏေကို သိမ်တွင်းရှိသံဃာ့အလယ်တွင်ထားကာ နှစ်တောင့်ထွာဟတ္ထပါသ်စပ်၍ ထိုင်နေကြသောသံဃာသည် “သုနာတု မေ ဘန္တေ သံံဃော—” အစချီသော ဉတ္တိစတုတ္ထကမ္မဝါစာကို ပြင်းသင့်သည့်နေရာပြင်း ပီသင့်သည့်နေရာတွင်ပီ ကြည်သင့်သောနေရာတွင်ကြည်လျှက် ဌာန်ကရိုင်းပီပီရွတ်ဖတ်ပြီး၍ ဉတ္တိစတုတ္ထကမ္မဝါစာ ပထမတစ်ကြိမ်ဆုံးသည်နှင့်တစ်ပြိုင်နက် ရဟန်းလောင်းရှင်သာမဏေသည် မြင့်မြတ်သောရဟန်းအဖြစ်သို့ရောက်လေတော့၏။
သို့သော် ဆရာတော်များသည် ရဟန်းအဖြစ်သေချာစေလို၍လည်းကောင်း ပင့်ဖိတ်ထားသော ဝိနည်းကျွမ်းကျင်သည့်သံဃာသည် ရဟန်းလောင်းရှင်သာမဏေအား ချီးမြှောက်စေခြင်းအကျိုးငှာလည်းကောင်း ဉတ္တိစတုတ္ထကမ္မဝါစာကို သုံးကြိမ်သုံးခါဖတ်၍ ရဟန်းလောင်းအားချီးမြှောက်လေ့ရှိကြလေ၏။
ဤတွင် မြင့်မြတ်သော ရဟန်းအဖြစ်ခံရယူသော ဥပသမ္ပဒကံ လုပ်ထုံးလုပ်နည်းပြီးလေတော့၏။ သို့သော် ရဟန်းဖြစ်စထိုခဏ၌ပင် အရေးကြီးသော ဝိနည်းဆိုင်ရာများကို ထိုင်ရာမထ အရေးတကြီးဆုံးမဩဝါဒပေးရမည်ဟု ဗုဒ္ဓအရှင်မိန့်မှာတော်မူခဲ့သောကြောင့် အရေးကြီးသောဝိနည်းဆိုင်ရာဩဝါကထာ ကျန်ပေသေး၏။ ဆက်ရေးပါမည်။
Full ordination ဥပသမ္ပဒကံခေါ်သော ရဟန်းအဖြစ်ခံယူမှုတွင် လုပ်ထုံးလုပ်နည်း
Full ordination ဥပသမ္ပဒကံခေါ်သော ရဟန်းအဖြစ်ခံယူမှုတွင် လုပ်ထုံးလုပ်နည်း
ဆိုခဲ့ပြီးသည့်အတိုင်း ၁။ ဆံမုဆ်ဆိကျင်စွယ်ရိတ်ပယ်ခြင်း၊ ၂။ ဖန်ရည်စွန်းသောသင်္ကန်းကိုဝတ်ဆင်ခြင်း၊ ၃။ ဥပဇ္ဈာယ်ဆရာတော်ချပေးသော သရဏဂုံကိုဌာန်ကရိုင်းပီပြင်စွာရွတ်ဆိုခြင်း၊ ဤသုံးချက်ပြည့်စုံလျှင် ရှင်သာမဏေ(ကိုရင်)ဖြစ်လေတော့၏။ ရဟန်းအဖြစ်ကိုတော့မရောက်သေးပေ။
ကိုယ်ရင်ခေါ် သာမဏေဘဝသည် အသက်ကြီးသည်ဖြစ်စေ ငယ်သည်ဖြစ်စေ မည်သည့်အသက်အရွယ်၌မဆိုဖြစ်ခွင့်ရှိသော်လည်း full ordination ဥပသမ္ပဒကံခေါ် ရဟန်းအဖြစ်ကိုရရှိရန်ကား အချက်အလက်ပေါင်း အတော်များများလိုအပ်ပေ၏။ ထို့ကြောင့် ရဟန်းအဖြစ်သည် ဖြစ်ချင်တိုင်းဖြစ်ခွင့်မရပေ။ အကြောင်းအကျိုးအားလုံးပြည့်စုံညီညွတ်မှသာ ဖြစ်ခွင့်ရနိုင်ပေ၏။
အရေးအကြီးအဆုံးအချက်သည် အသက် ၂၀ ပြည့်ရပေမည်။ မည်သည့်လူမျိုး မည်သည့်နိုင်ငံသားဖြစ်စေ အသက် ၂၀ မပြည့်ဘဲ ရဟန်းအဖြစ်ကိုခံယူခွင့်မရှိပေ။ လူ့လောကထဲတွင် ၁၈ နှစ်ကိုအရွယ်ရောက်သည်ဟုသပ်မှတ်ကာ ကိုယ်တိုင်ဆုံးဖြတ်လုပ်ကိုင်နိုင်သည့်တိုင်အောင် ရဟန်းအဖြစ်ကိုခံယူမည့်သူသည်ကား အသက် ၂၀ ပြည့်ကိုပြည့်မှသာ ရဟန်းအဖြစ်ခံယူရန်အရွယ်ရောက်ပေ၏ဟု ဗုဒ္ဓအရှင်ပညတ်တော်မူထားခဲ့ပေ၏။
ဤကားသာမဏေရပဗ္ဗဇ္ဇ (ရှင်သာမဏေအဖြစ်ခံယူမှု)နှင့် ဥပသမ္ပဒပဗ္ဗဇ္ဇ (ရဟန်းအဖြစ်ခံယူမှု)တို့၏ အဓိကအကျဆုံးအချက်ဖြစ်ပေ၏။ ထို့ကြောင့်ရဟန်းအဖြစ်သည်ရခဲ၍ အချိန်ရသောခဏဝယ် ရဟန်းအဖြစ်ကိုခံယူချင်စိတ်ပြင်းပြကာ ရက်အပိုင်းအခြားဖြင့် ရဟန်းအဖြစ်ခံယူခြင်းကို “ဒုလ္လဘ”ရဟန်း- ခဲယင်းစွာရဟန်းအဖြစ်ခံယူရသူဟု ခေါ်ရပေ၏။
ဤသည်ကိုစိတ်မှာစွဲထင်အောင်ဖတ်ထားပါ။ မပြီးသေးဆက်ရေးမည်။ ဤအဆင့်တွင်မှတ်သားစရာ အချက်အလက်အတော်များသည်။ အလွန်အရေးကြီသည်။ အချို့ဆိုဒုလ္လဘဝတ်တယ် ဒုလ္လဘဆိုတာ ဘာအဓိပ္ပါယ်မှန်းမသိဘဲ လူထဲပြန်ရောက်သွားသူတွေအများကြီးပဲ။
ရဟန်းလောင်း သိမ်ထဲမှသံဃာ့အလည်တွင်ရင်ဆိုင်ရသော မေးခွန်း ၁၄ ခု
===============================================
၁။ ကုဋ္ဌံ- သင့်မှာ နူနာရောဂါရှိသလား။
၂။ ဂေဏ္ဍာ- မြင်းဘုအနာ အိုင်းအမာမျိုးရှိသလား။
၃။ ကိလာသော- ယားယံပေါက်ကွဲ ပွေးကြီးဝဲကြီးအနာမျိုးရှိသလား။
၃။ သောသော- အသွေးအသားတို့ကိုခမ်းခြောက်စေတတ်သော ခယရုပ်ချောင်းဆိုးပန်းနာမျိုးရှိသလား။
၄။ အပမာရော- ဝက်ရူးကြက်ရူးအနာမျိုးရှိသလား။
၅။ မနုသောသိ- လူသားစင်စစ်ဟုတ်ပါရဲ့လား။
၆။ ပုရိသောသိ- ယောကျ်ားစင်စစ်ဟုတ်ပါရဲ့လား။
၇။ ဘုဇိဿောသိ- ကျေးကျွန်အဖြစ်မှလွတ်သူမှန်ရဲ့လား။
၈။ အဏဏောသိ- ကြွေးမြီကင်းသူမှန်ရဲ့လား။
၉။ န’သိ ရာဇဘဋော- မင်းမှုထမ်းစားလခစားအဖြစ်မှလွတ်မြောက်သူမှန်ရဲ့လား။
၁၀။ အနုညာတော’သိ မာတာပိတူဟိ- မိရင်းဖရင်းတို့မှကြေကြေနပ်နပ်ခွင့်ပြုအပ်သူရော မှန်ရဲ့လား။
၁၁။ ပရိပုဏ္ဏဝီသတိဝဿောသိ- အသက်နှစ်ဆယ်ပြည့်ပြီးသူရောမှန်ရဲ့လား။
၁၂။ ပရိပုဏ္ဏံ တေ ပတ္တစီဝရံ- သပိတ်သင်္ကန်းပြည့်စုံသူရောမှန်ရဲ့လား။
၁၃။ ကိံ နာမော’သိ- သင်၏ဥပဇ္ဈာယ်ဆရာတော်ပေးအပ်သောရဟန်းအမည်သည် အဘယ်အမည်ဖြစ်သနည်း။
၁၄။ ကော နာမော တေ ဥပဇ္ဈာယော- သင်၏ရှင်အဖြစ်ရဟန်းအဖြစ်ကိုပြုပေးခဲ့သော ဥပဇ္ဈာယ်ဆရာတော်၏အမည်သည် အဘယ်အမည်ဖြစ်သနည်း။
အထက်ပါရဟန်းလောင်းသံဃာ့အလယ်တွင် အမေးခံရမည့်မေးခွန်းတိုင်းသည် အဓိပ္ပါယ်အလွန်ရှိကြ၏။ သူ့မေးခွန်းနှင့်သူ့ဝတ္ထုကျယ်ပြန့်စွာရှိ၏။ သိလိုကသီးသန့်လေ့လာရပေမည်။ ဤနေရာ၌ရေးရန် အချိန်အရနေရာအရအခက်အခဲများစွာရှိပေ၏။
သေချာသည်ကား မည်သည့်နိုင်ငံမည်သည့်လူမျိုးမှ ရဟန်းအဖြစ်ခံယူမည့်သူဖြစ်စေ ရဟန်းအဖြစ်မခံယူသေးမီ ရှင်သာမဏေဝတ်ဖြင့်ပင် သိမ်ထဲတွင် သံဃာ့အလယ်၌ ဤမေးခွန်း ၁၄ ခုကို သိက္ခာတော်ရဝိနည်းကျွမ်းကျင်သော ဆရာတော်၏ အင်တာဗျူးသည်ကိုခံရမည်ဖြစ်ပေ၏။
အကယ်၍ ဤအချက်များထဲမှာ တစ်ချက်ချက်ငြိစိန်းနေခဲ့သော် ရဟန်းအဖြစ်ကိုခံပေးခွင့်မရှိပေ။ ထိုအချက်များထဲမှာ တစ်ချက်ချက်ငြိစွန်းနေသည်ကို သိလျှက်ရဟန်းအဖြစ်ကိုခံပေးသော ရဟန်းသံဃာသည် အာပတ်သင့်လေတော့၏။ အာပတ်သင့်လျှင် ဈာန်မဂ်ဖိုလ်ရရန် လမ်းကြောင်းပိတ်လေတော့၏။ အပ္ပမာဒေန သမ္ပာဒေထ။
သင်္ကန်းဝတ်ပြီးနောက် လုပ်ထုံးလုပ်နည်း
သင်္ကန်းဝတ်ပြီးနောက် လုပ်ထုံးလုပ်နည်း
အထက်ကဆိုခဲ့သည့်အတိုင်း ရဟန်းလောင်းရှင်သာမဏေလောင်းသည် သင်္ကန်းဝတ်ပြီးချိန်အထိ ဆံမုတ်ဆိတ်ကျင်စွယ်ရိတ်ပယ်ရခြင်း၊ ဖန်ရည်စွမ်းသောသင်္ကန်းကိုဝတ်ဆင်ရခြင်းဟူသော အဆင့်နှစ်ဆင့်ကိုကျော်ဖြတ်ခဲ့ပါပြီ။ သို့သော် ရှင်သာမဏေမဖြစ်သေးပေ။ သရဏဂုံသုံးပါးကို ဆရာချပေးသင်ပေးသည့်အတိုင်း ဌာန်ကရိုင်းကျကျပီပီသသဆိုပြီး သရဏဂုံယူဖို့ တစ်ဆင့်ကျန်နေပါသေး၏။
ထို့ကြောင့် ဆိုခဲ့ပြီးသောအရည်အသွေးများနှင့်ပြည့်စုံသော ရဟန်းလောင်းရှင်သာမဏေလောင်း၏ ဥပဇ္ဈာယ်ဆရာတော်ရှေ့မှချပေးသော သရဏဂုံသုံးပါးကို ပီရမည့်နေရာတွေမှာပီအောင် ကြည်ရမည့်နေရာတွေမှာကြည်အောင် လိုက်၍ရွတ်ဆိုပြီး သရဏဂုံယူရပေမည်။
ထိုကဲ့သို့ရွတ်ဆိုရာ၌ ဒုတိယက္ခရာများဖြစ်ကြသော “ခ၊ ဆ၊ ဌ၊ ထ၊ ဖ”စသော အက္ခရာများကို ပီပြင်ကြည်လင်အောင်ဖိ၍ရွတ်ဆိုရပါမည်။ အလားတူ စတုတ္ထက္ခရာများဖြစ်ကြသော “ဃ၊ ဈ၊ ဎ၊ ဓ၊ ဘ”စသော အက္ခရာများကိုလည်း ပီပြင်ကြည်လင်အောင်ဖိ၍ရွတ်ဆိုရပါမည်။
ဗုဒ္ဓံ-မှာ “ဓံ”ကို အသံပီပြင်ကြည်လင်အောင်ဖိ၍ရွတ်ဆိုရပေ၏။ ဂစ္ဆာမိ-မှာ “ဆာ”ကို အသံပီပြင်ကြည်လင်အောင် ဖိ၍ရွတ်ဆိုရပေ၏။ အလားတူ “ဓမ္မံ”မှ “ဓံ”ကိုလည်းကောင်း၊ “သံဃံ”မှ “ဃံ”ကိုလည်းကောင်း အသံကြည်လင်ပီပြင်အောင် ဖိ၍ရွတ်ဆိုရပေ၏။
၁။ ဗုဒ္ဓံ သရဏံ ဂစ္ဆာမိ။
၂။ ဓမ္မံ သရဏံ ဂစ္ဆာမိ။
၃။ သံဃံ သရဏံ ဂစ္ဆာမိ။
ဒုတိယမ္ပိ/တတိယမ္ပိ ဗုဒ္ဓံ သရဏံ ဂစ္ဆာမိ။ ဓမ္မံ သရဏံ ဂစ္ဆာမိ။ သံဃံ သရဏံ ဂစ္ဆာမိ။ ဟု ဒုတိယက္ခရာ စတုတ္ထက္ခရာများကို ဆရာသင်ပြချပေးသည့်အတိုင်း ပီပြင်ကြည်လင်အောင် ရွတ်ဆိုပြီးသည်ရှိသော် “တိယမ္ပိ သံဃံ သရဏံ ဂစ္ဆာမိ”။ ဆုံးသည်နှင့်တပြိုင်နက် “သာမဏေ”အဆင့်ပြီးမြောက်လေတော့၏။ ရဟန်းလောင်းသည် မြင့်မြတ်သော “ဥပသမ္ပဒကံ”ဟုဆိုအပ်သော ရဟန်းအဖြစ်ခံယူရန် နောက်ဆုံးအဆင့်ကြီးကို အောင်မြင်စွာပြီးမြောက်ခြင်းဖြစ်လေတော့၏။
ကမ္ဘာပေါ်က မည်သည့်နိုင်ငံသားက မည်သည့်နိုင်ငံတွင် ရဟန်းအဖြစ်ကိုခံယူသည်ဖြစ်စေ ထေရဝါဒသာသနာတွင် ဤလုပ်ထုံးလုပ်နည်းအတိုင်းသာ သာသနာ့ဘောင်သို့ဝင်ခွင့်ရပေ၏။ အခြားနည်းမရှိပေ။ ရဟန်းအဖြစ်ကိုခံယူရန် ပထမအဆင့်ဖြစ်သော ရှင်သာမဏေအဆင့်ပြီးချိန်တွင် ရှင်သာမဏေတို့ထိမ်းသိန်းရမည့် ဝိနည်းသိက္ခာပုဒ်များဖြစ်သည့် အကျဉ်း ၁၀ ပါး၊ အကျယ် ၁၂၀ သော ဝိနည်းသိက္ခာပုဒ်များကို ထိုသာမဏေ၏ဥပဇ္ဈာယ်ဆရာတော်က်ုယ်တိုင် ထိုင်ရာမထပြောပြထိမ်းသိန်းစေရပေ၏။
ရှင်သာမဏေထိမ်းသိန်းရမည့် ၁၀ ပါးသီလ
၁။ ပါဏာတိပါတာ ဝေရမဏိ- သူ့အသက်သတ်ခြင်းမှရှောင်ကြဉ်ပါ၏။
၂။ အဒိန္နာဒါနာ ဝေရမဏိ- ပိုင်ရှင်မပေးသောဥစ္စာကို ယူခြင်းမှရှောင်ကြဉ်ပါ၏။
၃။ အဗြဟ္မစရိယာ ဝေရမဏိ- မေထုန်အကျင့်ကိုကျင့်ခြင်းမှ ရှောင်ကြဉ်ပါ၏။
၄။ မုသာဝါဒါ ဝေရမဏိ- လိမ်ညာပြောဆိုခြင်းမှရှောင်ကြဉ်ပါ၏။
၅။ သုရာမေရယမဇ္ဇပမာဒဋ္ဌာနာ ဝေရမဏိ- မူးယစ်မေ့လျှော့စေတတ်သော ကွမ်းဆေးအပါအဝင် သေရည်အရက်စသည်တို့ကို သုံးစွဲခြင်းမှရှောင်ကြဉ်ပါ၏။
၆။ ဝိကာလဘောဇနာ ဝေရမဏိ- မွန်းလွဲအခါစားသောက်ခြင်းမှ ရှောင်ကြဉ်ပါ၏။
၇။ နစ္စဂီတဝါဒိတဝိသူကဒဿနာ ဝေရမဏိ-ကခြင်းသီဆိုခြင်းပွဲလမ်းသဘင်ကြည့်ကြည့်ရှုခြင်းတို့မှ ရှောင်ကြဉ်ပါ၏။
၈။ မာလာဂန္ဓဝိလေပနဓာရနမဏ္ဍနဝိဘူသနဋ္ဌာနာ ဝေရမဏိ- ပန်းနံ့သာရေမွေးနံ့သာဆီစသည်တို့ကိုဆောင်ထားခြင်းလိမ်းကြံခြယ်သခြင်းတို့မှ ရှောင်ကြဉ်ပါ၏။
၉။ ဥစ္စာသယနမဟာသယနာ ဝေရမဏိ- ကြီးကျယ်ခမ်းနားဆန်းပြားသော အိပ်ယာနေယာတို့ကိုသုံးဆောင်နေထိုင်ခြင်းတို့မှ ရှောင်ကြဉ်ပါ၏။
၁၀။ ဇာတရူပရဇတပဋိဂ္ဂဟနာ ဝေရမဏိ- ရွှေငွေတို့ကိုအလှူခံခြင်းကိုင်တွယ်သုံးစွဲခြင်းမှရှောင်ကြဉ်ပါ၏။
ဤဆိုခဲ့ပြီးသော ၁၀ ပါးသီလကိုဥပဇ္ဈာယ်ဆရာတော်သည် ဖြစ်သစ်စအပြစ်ကင်းစင်နေသော ရှင်သာမဏေအား ထိုင်ရာမထရှေ့မှချပေးကာ လိုက်ဆိုစေလျှက် အသေအချာထိမ်းသိန်းရန် အထူးဩဝါဒပေးရပါသည်။ ကျန်သော အကျယ် ၁၂၀ သိက္ခါပုဒ်များကိုကား နေ့စဉ်စာသင်သလိုသင်ပေးသွားရပါမည်။ အကယ်၍ ဥပဇ္ဈာယ်ဆရာတော်က မအားမလပ်မှသာ စွမ်းနိုင်သောတပည့်တစ်ပါးပါးကို သင်ပေးရန်လွဲအပ်ရပေ၏။
အမျိုးဘာသာသာနာတော်ကို ချစ်လှပါသည်ဆိုသော မြန်မာ့ထေရဝါဒီတို့သည် အထက်ပါသိက္ခာပုဒ်များကို သဒ္ဓါပညာတို့ဖြင့်စနစ်တကျလေ့လာမှတ်သား လိုက်နာအားထုတ်ထိုက်ပေ၏။ ရှင်ဖြစ်လျှက်ရှင့်ဝိနည်းကို မလိုက်နာစေခြင်းသည် ရဟန်းဖြစ်သည်အထိ ဝိနည်းကိုမလိုက်နာရန်တွန်းအားများကိုဖြစ်စေပါသည်။ ဤသို့ဖြစ်က သာသနာတည်ရေးအတွက် အလွန်အန္တရာယ်ကြီးပါသည်ဆိုသည်ကို အထူးသဘောပေါက်ကြရန်လိုအပ်ပေ၏။
ဟိုခေတ်ဟိုအချိန်က အင်တာနက်ဆိုနာမရှိခဲ့သော်လည်း ယခုခေတ်အချိန်သည်ကား အင်တာနက်ခေတ်ဖြစ်လာနေပေပြီ။ မိမိတို့ကောင်းစွာကျင့်သလောမကျင့်သလောကို နိုင်ငံတကာထေရဝါဒအသိုင်းအဝိုင်းက မြင်သာထင်သာရှိလာနေပေပြီ။ အထူးသတိထားရန်လိုအပ်လာပေ၏။ အပ္ပမာဒေန သမ္ပာဒေထ။
ဥပသမ္ပဒကံခေါ်သော ရဟန်းခံမှု လုပ်ထုံးလုပ်နည်းများကို ဆက်ရေးပါမည်။ like မလုပ် react မလုပ်ဘဲ တိတ်တိတ်လေးခိုးဖတ်နေတတ်သော list ထဲကလူတွေလည်း ဖြူစင်စွာ like လုပ်သူ react လုပ်သူများနှင့် အသိတူရပါစေ။
ဆံပင်ကိုရိတ်ပယ်နေစဉ်လုပ်ထုံးလုပ်နည်း
ဆံပင်ကိုရိတ်ပယ်နေစဉ်လုပ်ထုံးလုပ်နည်း (shaving procedure)
ရဟန်းလောင်း ကိုရင်လောင်းသည် ဆိုခဲ့ပြီးသော ဥပဇ္ဈာယ်အရည်အသွေးမီသော ဥပဇ္ဈာယ်ဆရာတော်၏ လမ်းညွှန်ချက်ဖြင့် ဆံပင်ရိတ်ပယ်ဆံချနေစဉ်တွင် တွေးချင်ရာတွေးနေသောစိတ်ကို တွေးချင်ရာမတွေးစေဘဲ အရည်အသွေးမြင့်စိတ်အဖြစ် တည်ဆောက်နိုင်အောင် “ဆံင်ပင်၊ မွှေးညှင်း၊ ခြေသည်းလက်သည်း၊ သွား၊ အရေ”ဟူသော တစပဉ္စကကမ္မဋ္ဌာန်းကိုစီးဖျန်းနေရပါတယ်။
မဟာဂန္ဓာရုံဆရာတော်ဘုရားကြီး သင်ပြပေးတော်မူခဲ့သော တစပဉ္စကကမ္မဋ္ဌာန်းအကျဉ်း
“ငါ၏ကိုယ်မှာ နံ့သာမွှေးကြိုင် မြဲခိုင်လှစွာ ကောင်းရာမမြင် ဆံပင်သာရှိ အမွေးရှိ၏ ရှိသည့်လက်သည်း ခြေအသည်းနှင့် သွားလည်းတစ်ထွေ အရည်တစ်မျိုး ညီနံ့ဆိုးသည် အသိုးအပုပ်ချည်းပါတကား”။
ရဟန်းလောင်းရှင်လောင်းသည် ဤတစပဉ္စကမ္မဋ္ဌာန်းကို ခေါင်းရိတ်ဆံချနေစဉ်အတွင်း မျက်စိလေးဖွဖွမှိတ်ကာ ထပ်ခါထပ်ခါရွတ်ဆိုနေရပါတယ်။ သမထကမ္မဋ္ဌာန်း concentration meditation အမျိုးလေးဆယ်ထဲမှ တစ်မျိုးဖြစ်ပါတယ်။ ဟုတ်ပါတယ်။ ဆံပင်သည်လည်း ငါမဟုတ်ပုဂ္ဂိုလ်သတ္တဝါမဟုတ်။ ခရစ္စယာန်မွစ္စလင်ဟိန္ဒူဂျူးဗုဒ္ဓဘာသာမဟုတ် စက်ဆုပ်စရာအညှီနံ့ဖြင့်သာရှိနေသော ရုပ်ဝတ္တုတစ်ခုသာဖြစ်ပါတယ်။ မွေးညှင်းစသည်တို့သည်လည်း အလားတူ စက်ဆုပ်စရာအညှီနံ့ဖြင့်ရှိသင့်တဲ့နေရာမှာ ရှိနေသောရုပ်ဝတ္တုအစိတ်အပိုင်းများသာဖြစ်ပါတယ်။
ဆိုခဲ့သော “ဆံပင်၊ မွှေးညှင်း၊ ခြေသည်းလက်သည်း၊ သွား၊ အရေ”တို့သည် အမှန်ပင်စက်ဆုပ်စရာရွံစရာအလွန်ကောင်းပါတယ်။ ရှင်းလောင်းရဟန်းလောင်းဖြစ်သူက မယုံပါဘူးဆိုရင် လက်တွေ့စမ်းသပ်ကြည့်လို့ရတဲ့ သိပ္ပံနည်းကျကမ္မဋ္ဌာန်းတစ်ခုဖြစ်ပါတယ်။ ဒါကိုရွတ်ဆိုနေတဲ့အခါ ဘာသာရေးအလုပ်အဖြစ်ရွတ်ဆိုရတာမဟုတ်ပါဘူး။ ကိုယ့်ရဲ့ခန္ဓာကိုယ်မှာ အမှန်တကယ်ရှိနေတဲ့တရားကို အမှန်အတိုင်းမြင်စေရန်သာ repeatedly ထပ်ခါခပ်ခါအဆက်မပြတ် စိတ်ဖြင့်ရွတ်ဖတ်နေရခြင်းဖြစ်ပါတယ်။ ဘာသာရေးနှင့်လုံးဝကိုမဆိုင်ပါဘူး။ လူတိုင်းနားလည်နိုင်သော ဓမ္မနှင့်သာဆိုင်ပါတယ်။
ရဟန်းလောင်းရှင်လောင်းဟာ ဆံချလို့မပြီးမချင်း အဆက်မပြတ် စိတ်ဖြင့်မြင်အောင်အာရုံပြုကာ ရွတ်ဆိုနေရပါတယ်။ နံဘေးကလူတွေကလည်း တောင်ရောက်မြောက်ရောက် စကားတများဖြင့်မနေရပါဘူး။ ရဟန်းလောင်းရှင်လောင်းနှင့်အတူ တစပဉ္စကကမ္မဋ္ဌာန်းကိုလိုက်၍ ရှုနိုင်ပွားနိုင်ရင် ပို၍အကျိုးများပါတယ်။ အဲဒီ”တစပဉ္စက”ကမ္မဋ္ဌာန်းဖြင့် ခေါင်းရိတ်ဆံချရင်း အရှိကိုအရှိအတိုင်းမြင်ကာ တရားရသွားတဲ့ ဖြစ်စဉ်တွေဗုဒ္ဓလက်ထက်ကတည်းကရှိခဲ့ပါတယ်။
အများသိနေတဲ့ဝတ္ထုဇာတ်လမ်းတစ်ခုကတော့ အရှင်နန္ဒပါပဲ။ အရှင်နန္ဒအလောင်း နန္ဒမင်းသားလေးဟာ အလွန်လှတဲ့မိန်းမချောလေးနဲ့လက်ထပ်ခါနီးမှာ မြတ်ဗုဒ္ဓကကျောင်းတော်ကိုခေါ်လို့ပါသွားရင်း မြတ်ဗုဒ္ဓကရဟန်းပြုပေးလိုက်တယ်။ သူ့စိတ်နဲ့သူ့ကိုယ်ဘယ်ဟုတ်တော့မှာလဲ။ ပျော်လည်းမပျော်ဘူး။ နောက်ဆုံးတော့ ဒီ”တစပဉ္စကကမ္မဋ္ဌာန်း”နဲ့ပဲ တရားမြင်ကာ ဆက်အားထုတ်လို့ တရားအထူးအသိအထူးရကာ သူ့ကောင်မလေးကိုစွန့်နိုင်သွားတယ်။ အခုလည်းအားထုတ်ရင် အဲဒီလိုဖြစ်စဉ်မျိုးဖြစ်နိုင်ပါတယ်။
ဒီမှာ ခေါင်းရိပ်ဆံချသော ပထမအဆင့်မှာပင် မည်သည့်လူမျိုးမည်သည့်နိုင်ငံသားဖြစ်စေ ရှင်လောင်းရဟန်းလောင်းရဲ့စိတ်ဓာတ်ဟာ တရားအရည်အသွေးဖြင့်ဘယ်လောက်အဆင့်မြင့်နေပြီလဲဆိုတာကြည့်နိုင်ပါတယ်။ ဘာသာရေးဆန်ဆန်အစွဲအလန်းတွေ ကိုယ့်ဘာသာကိုအထင်ကြီးစေကာ သူများဘာသာကိုပုတ်ခတ်စော်ကားတာတွေ ဘာတစ်ခုမျှမပါဘူး။
အပူဇော်ခံထိုက်တဲ့ သံဃာအရည်အသွေးရှိတဲ့ သာသနာ့ဘောင်ကိုဝင်တော့မယ်ဆိုတဲ့ရဟန်းလောင်းရှင်လောင်းရဲ့စိတ်အရည်အသွေးကိုက ဘယ်လောက်ကြည်ညိုစရာကောင်းနေပြီလဲ ဘယ်လောက်မြင့်နေပြီလည်း ခန့်မှန်းကြည့်လို့ရနေပါပြီ။ ဖြူစင်မြင့်မြတ်တဲ့သုပ္ပဋိပန္နစသောဂုဏ်တော်ကိုးပါးနှင့်ပြည့်စုံသော သံဃာအဖွဲ့အစည်းရှိရာ သာသနာ့ဘောင်ဝင်မည့်သူရဲ့ စိတ်နေစိတ်ထားအရည်အသွေးဟာ အဲဒီလိုမြင့်နေရမှာပါ။
သင်္ကန်းဝတ်ကတည်းက အရည်အသွေးမီသော ဥပဇ္ဈာယ်ဆရာကောင်း အဆုံးအမကောင်းမရကြတဲ့အခါ သင်္ကန်းဝတ်တုန်းကလည်း မတော်မလျှော်အတွေးတွေနဲ့ဝတ်ကြ ဝတ်ပြီးပြန်တော့လည်း ဝိနည်းတွေကိုအလေးထားရမှန်းမသိဖြစ်ကုန်တတ်ပါတယ်။ သင်္ကန်းဝတ်ရှင်ပြုရဟန်းခံရတာတွေဟာ အများကြီးဆုံးရှုံးသွားနိုင်ပါတယ်။ ဒါကြောင့်ပင် မြန်မာ့ရဟန်းသံဃာလောကဟာ ဖြစ်ချင်သလိုဖြစ်ပျက်ချင်သလိုပျက်နေသလို ဖြစ်လာနေတာဖြစ်ပါကြောင်း။ဒါကြောင့်ရဟန်းခံရှင်ပြုတော့မည့် ရှင်လောင်းရဟန်းလောင်းသည် အရည်အသွေးမီသော ဥပဇ္ဈာယ်ဆရာကောင်းကို အလျှင်ရှာဖွေအတည်ပြုဖို့လိုတယ်ဆိုတာကိုတော့ ဘယ်တော့မှမမေ့ပါနှင့်။
ဒေါက်တာဘွဲ့ရ PhD ဘွဲ့ရအရည်အသွေးကိုဆိုလိုသည်မဟုတ်။ ဤဘွဲ့များသည် အမှန်တကယ်စိတ်ဓာတ်ဖွံ့ဖြိုးရေး နိဗ္ဗာန်မဂ်ဖိုလ်ရရေးအတွက် သာသနာ့ဘောင်ရဟန်းသံဃာအဖွဲ့အစည်းအတွက် အရေးပါသောအရည်အသွေးများမဟုတ်ကြ။ ဘယ်လောက်ပင်ဘွဲ့တွေရပါစေ ဗုဒ္ဓပညတ်ထားသော ဥပဇ္ဈာယ်အရည်အသွေးမမီလို့မဆုံးမတတ်ဘူး ရဟန်းလောင်းရှင်သာမဏေကလည်း ဆုံးမသည့်အတိုင်း သဒ္ဓါပညာအားကောင်းကောင်းဖြင့်မလိုက်နာဘူးဆိုရင်တော့ သာသနာ့အရည်အသွေး ရဟန်းသံဃာအရည်အသွေးဟာ ဆုပ်ယုတ်ကျဆင်းဖို့ချည်းသာမှတ်ပေတော့။
တကယ့်ဗုဒ္ဓပညတ်သောအရည်အသွေးသည်ကား “ဆယ်ဝါပြည်တင်း၊ ဝိဘင်းနှစ်ဖြာ၊ ကမ္မာကမ္မ၊ ခန္ဓကနှင့်၊ နာမ်ရုပ်ပိုင်ပိုင်ဟောပြနိုင်၊ ကျောင်းထိုင်ငါးအင်္ဂါ”ဟူသော အရည်အသွေးရှိသော ထိုအရည်အသွေးနှင့်ကိုက်ညီသော ဥပဇ္ဈာယ်ဆရာကိုသာဆိုလိုသည်။ ဤကဲ့သို့သောဗုဒ္ဓသပ်မှတ်ပေးထားသည့် ဥပဇ္ဈာယ်ဆရာ အရည်အသွေးမျိုးတွေ့ရှိက မည်သည့်နိုင်ငံတွင်မဆို ရဟန်းခံရှင်ပြုလုပ်နိုင်ပါကြောင်း။
ဆက်ရေးပါဦးမည်။
ဗုဒ္ဓချမှတ်ခဲ့သောရဟန်းအဖြစ်ခံယူပုံနှင့် ရဟန်းဖြစ်ပြီးဆက်လုပ်ရမည့် procedure
ဗုဒ္ဓချမှတ်ခဲ့သောရဟန်းအဖြစ်ခံယူပုံနှင့် ရဟန်းဖြစ်ပြီးဆက်လုပ်ရမည့် procedure (ဤအတိုင်းမဟုတ်ကကြိုက်သလိုပြုပြင်ဆက်၍သာမှားနေပေဦးမည်မှတ်)
Facebook ဟာမြန်မာပြည်က ပညာတတ်အသိုင်းအဝိုင်းမည်မျှကို ကိုစားပြုသည်ဟုအတိအကျမသိ။ သေချာတာကတော့ အနှစ်သာရအရကိုယ့်လူမျိုးအချင်းချင်း အထင်မကြီးတာ မယုံကြည်တာ မညီညွတ်တာ ကိုယ့်ကိုကိုအထင်ကြီးဘဝင်ကိုင်နေကြကတာတွေကိုအထင်းသားတွေ့နေရတာပါ။ ဆရာကြီးတွေအလွန်များတပည့်အလွန်ရှား။
သာသနာရေးလိုကိစ္စတွေမှာလည်း professional တွေမတွေ့ရ။ emotional and personal တွေကိုသာတွေ့နေရပြီး သူတို့တွေရဲ့ထင်ရာမြင်ရာဝေဖန်တာတွေကိုတွေ့နေရတော့ စိတ်မကောင်းဖြစ်မိပါတယ်။ လောကီမျက်စိလောကီအသိတွေက influenced ဖြစ်နေပြီး အကုသိုလ်မကြောက် ဘဝသံသရာမကြောက် ကမောက်ကမဝေဖန်ကြတယ်။
ဗုဒ္ဓအလိုကျနှင့်အလှန်းဝေးပြီး ကြာလေကြာလေ ဝိနည်းနဲ့လည်းဝေး အဘိဓမ္မာနဲ့လည်းဝေး လောကီမျက်စိသေးသေးလေးတွေနဲ့သာ အရိယာမျက်စိ အရိယာအသိပညာကြီးပမာ အထင်ကြီးကာ ဝေဖန်ချင်ရာ ထင်ရာမြင်ရာကို စည်းဘောင်မပါဘဲဝေဖန်နေကြတယ်။
ရဟန်းသံဃာဘဝဆိုတာ ဗုဒ္ဓအလိုကျဗုဒ္ဓချမှတ်သောစည်းကမ်းများနှင့်သာနေထိုင်ကြရမှာပါ။ ရဟန်းအဖြစ်ခံယူတယ်ဆိုတာလည်း ဗုဒ္ဓအလိုကျဖြစ်ဖို့သာလိုပါတယ်။ ဗုဒ္ဓအလိုကျရဟန်းအဖြစ်ကိုခံယူမည့်သူသည် ရှေးဦးစွာဥပဇ္ဈာယ်ဆရာအဖြစ် ကြပ်မတ်မေးမည့် ဝါတော် ၁၀ ဝါကျော်သည့် ဝိနည်းနှင့်အညီနေထိုင်ကျင့်သုံးသည့် ရုပ်တရားနာမ်တရားတို့ကိုလည်း ဝိပဿနာဉာဏ်ဖြင့်ကြေညက်နေသည့် လေးစားအားထားထိုက်သော ဥပဇ္ဈာယ်ဆရာတော်ကိုရွေးချယ်ရပါတယ်။
ဥပဇ္ဈာယ်ဆရာတော်ရဲ့အရည်အသွေးက (၁)။ သိက္ခာတော် ၁၀ ဝါပြည့်ပြီးဖြစ်ရပါမယ်။ ၂။ ဘိက္ခုဝိဘင်းဘိက္ခုနီဝိဘင်းအပါအဝင် စူဠဝါမဟာဝါဝိနည်းကျမ်းများမှာလာတဲ့ ဝိနည်းကျင့်ဝတ်များကိုနားလည်ကျင့်သုံးဆုံးမတတ်ပြီး တပည့်ရဟန်းသာမဏေများကိုလည်းလိုက်နာအောင်ဆုံးမနိုင်မှုရှိရပါမယ်။ ရဟန်းသံဃာနှင့်သာပတ်သက်သော ကံကြီးကံငယ်များကို ကျမ်းစာနှင့်အညီဆောင်နိုင်စွမ်းရှိရပါမယ်။ (၃)။ ရုပ်နာမ်ဓမ္မသာဝကို ဝိပဿနာဉာဏ်ဖြင့်ပင်ကြေညက်စွာ နားလည်ထားပြီးပြန်လည်သင်ပြအားထုတ်စေတတ်ရပါမယ်။
ဤကဲ့သို့သောအရည်အသွေးနှင့်ပြည့်စုံသည့် ဥပဇ္ဈာယ်ဆရာရှိထားပြီး၍ ရဟန်းအဖြစ်ခံယူလိုသူသည် ပထမအဆင့်အနေဖြင့် သာမဏေအဖြစ်ကိုခံယူရပါတယ်။ သာမဏေအဖြစ်ခံယူမှုအစီအစဉ်ထဲမှာ အရေးကြီးတဲ့မဖြစ်မနေလုပ်ရမည့်အချက်သုံးချက်ရှိပါတယ်။
(၁)။ ကေသမဿုံ ဩဟာရေတွာ- ဆံပင်မုဆိတ်ကျင်စွယ်ရိတ်ပယ်ရပါမယ်။ (၂)။ ကာသာယာနိ ဝတ္ထာနိ အစ္ဆာဒေတွာ- ဖန်ရည်စွမ်းတဲ့အဝတ်သင်္ကန်းကိုဝတ်ရပါမယ်။ ၃။ သရဏဂုံသုံးပါးကို ဥပဇ္ဈာယ်ဆရာချပေးသည့်အတိုင်း ရဟန်းလောင်းသာမဏေလောင်းက ဌာန်ကရိုင်းကျကျ ပီပီပြင်ပြင်လိုက်ဆိုရပါတယ်။
ဤဆိုခဲ့သောအချက် ၃ ချက်ကိုလည်း မိမိရွေးချယ်ထားသော ဥပဇ္ဈာယ်ဆရာနှင့်ညှိုနှိုင်းကာ ဥပဇ္ဈာယ်ဆရာတော်၏အသိအမှတ်ပြုမှုဖြင့်သာလုပ်ရပါမယ်။ ဆိုလိုသည်မှာ သင်္ကန်းကိုဝတ်ချင်သလိုဝတ်လာ၍မရပါ။ ဒါဟာ မည်သည့်နိုင်ငံသားမည်သည့်လူမျိုးဖြစ်စေ ထေရဝါဒသာသနာတွင် ရဟန်းအဖြစ်ကိုခံယူမည်ဆိုက မည်သည့်နိုင်ငံတွင်ရဟန်းအဖြစ်ခံယူသည်ဖြစ် ပထမအဆင့်အနေဖြင့် မဖြစ်မနေဖြတ်သန်းရမည့်အဆင့်ဖြစ်ပါတယ်။
မှတ်ချက်။ ။မအားလပ်သေး၍ ဒီမှာပဲခနရပ်ထားခဲ့ပါမယ်။ ဆက်ရေးပါမည်။ စိတ်ဝင်စားလျှင်ဆက်ဖတ်ပါ။ မိမိ၏အတွေ့အကြုံအသိအမြင် သိက္ခာတော်အရ မြန်မာ့ထေရဝါဒသာသနာတွင် ဗုဒ္ဓအလိုကျနှင့်လွဲချော်ကာ မဖြစ်သင့်သည့်ချွတ်ယွင်းချက်များ ဖြစ်လိမ့်ဦးမည်ဟု တွေ့မြင်နေရပေ၏။
၂၁ ရာစု ဗုဒ္ဓဘာသာသည် သင်တို့သာဗုဒ္ဓဘာသာနှင့်ဆိုင်သည်ဟုထင်မှတ်ကာ လုပ်ချင်ရာလုပ်က ကမ္ဘာ့ပညာတတ်ထေရဝါဒပညာရှင် အသိုင်းအဝိုင်းနှင့် အဆက်ပြတ်ကာ မြန်မာ့ထေရဝါဒကို ဖယ်ကြဉ်ထားမည်ကို စိုးရိမ်မိသည်ကားအမှန်ပေ။
အမှန်ကိုမြင်တတ်လျှင် မြန်မာသည် ချွတ်ယွင်းမှုတွေအလွန်များကာ professional မဆန်ဘဲ emotional and personal တွေလွှမ်းမိုးခံရကာ စီမံခန့်ခွဲမှုမတတ်သောကြောင့် နိုင်ငံရေးတွင်လည်း မိတ်ဆွေအပေါင်းအသင်းစစ်စစ်တွေရှားသလိုဖြစ်ခဲ့ပါပြီ။ ကိုယ့်ဆီကခြစ်ကုပ်ယူမည့်မိတ်ဆွေကသာမြန်မာနှင့်မိတ်ဖွဲ့ကြသည်ကိုတွေ့နေရပေ၏။ ရသမျှယူမည်ဟူသော မိတ်ဆွေတွေများနေ၏။
လောလောဆယ်တော့ မိမိ၏အမြင်အရ ဂျပန်တစ်နိုင်ငံသာလျှင် မြန်မာ့မိတ်ဆွေစစ်နေရာတွင်ရှိသည်ဟုခံစားရပါသည်။ သင်ခန်းစာယူစရာပါ။ အချိန်မီသင်္ခန်းစာမယူမပြုပြင်မိက နောင်မျိုးဆက်သားသားမီးမီးလေးတွေရဲ့ဂုဏ်သိက္ခာအတွက်အလွန်ကိုစိုးရိမ်ရပါတယ်။
အောက်ပါပုံသည် အမေရိကန်လူမျိုးသာမဏေရဇောတိမန္တသည် အမေရိကန်လူမျိုးဥပဇ္ဈာယ်ဆရာတော်နှင့်ပင် အမေရိကန်နိုင်ငံရှိ အဘယဂီရိထေရဝါဒကျောင်းတိုက်တွင် ရှင်ပြုရဟန်းခံအခန်းအနားကို ဒီဇင်ဘာလ ၂ ရက်နေ့က ကျင်းပပြုလုပ်နေခြင်းဖြစ်ပါသည်။ ထူးခြားသည်ကား အာရှသံဃာမျက်နှာ တစ်မျက်နှာမျှမတွေ့ရတော့ခြင်းတည်း။
အမေးအဖြေကဏ္ဍအရေးကြီးလှ
မေး။ ။ အရှင်ဘုရား အခုတလော ရေလွှမ်းမိုးတာ တောင်ပြိုတာစတဲ့ သဘာဝဘေးအန္တရာယ်တွေနဲ့ ပတ်သက်ပြီး အမြင်အမျိုးမျိုးပြောကြဆိုကြပါတယ်ဘုရား။ အရှင်ဘုရားခေတ်အမြင်ရှိသော ဆရာတော်တစ်ပါးအနေဖြင့် ဗုဒ္ဓဘာသာတရားတော်အရ တပည့်တော်တို့လည်း ဗဟုသုတရအများလည်းသိရအောင် ရှင်းပြပေးတော်မူပါဘုရား။
ဖြေ။ ။ အလွန်ကောင်းတဲ့မေးခွန်းပါ။ အချိန်ကိုက်မေးနိုင်တာအတွက်ပဲ ကျေးဇူးပင်တင်ရဦးမလားမသိဘူးနော်။ ဘုန်းဘုန်းတို့ဗုဒ္ဓဘာသာ ကျမ်းဂန်များအရဆိုရင် သတ္တဝါတို့ရဲ့သက်တမ်း အတိုးအဆုတ်ကနေစပြောရမယ်။
သက်တမ်းအတိုးအဆုတ်ဟာ ရာသီဥတုအစာအဟာရတွေနှင့်အတော်ပတ်သက်နေတာတွေ့ရတယ်။ ရာသီဥတုကောင်းကောင်းမှာနေထိုင်ရ၍ အဆီအနှစ်ပြည့်ဝသော အသီးအနှံအစာအဟာရတွေကိုစားနေရချိန်ရမှာသက်တမ်းရှည်ကြတယ်။ ရာသီဥတုမကောင်း၍ အဆီအနှစ်မကောင်းသော အစာအဟာရများကိုစားရတဲ့အခါတော့ သက်တမ်းတိုလာကြတယ်လို့ဆိုတယ်။
ဆိုခဲ့တဲ့ရာသီဥတုအဟာရကောင်းမကောင်းကလည်း သတ္တဝါတွေရဲ့ ကိုယ်အလုပ်နှုတ်အပြောမနောအကြံဆိုတဲ့ ကံသုံးပါးကောင်းမကောင်းနှင့် ဆက်စပ်နေပြန်ပါတယ်။ ဒါကြောင့်ဗုဒ္ဓဓမ္မဟာ အလွန်စိတ်ဝင်စားစရာကောင်းတယ်။ ယုတ္တိဗေဒဆန်တယ်။ အကြောင်းအကျိုးတွေကို ဆက်စပ်ကြည့်ရတယ်။ သတ္တဝါတွေပြုမူပြောဆိုကြံစီကြတဲ့ ကံတွေညံ့လာပြီဆိုရင် ရာသီဥတုဖေါက်ပြန်ပျက်စီးလာပြီး အဟာရတွေကလည်း ညံ့လာတယ်လို့ကျန်းဂန်များကဆိုပါတယ်။
အခုဒီအချက်ဟာ အလွန်စိတ်ဝင်စားစရာဖြစ်လာပြီ။ ကဲ–ဖြစ်နိုင်မဖြစ်နိုင်ဆန်းစစ်ကြည့်ရအောင်။ တစ်ကမ္ဘာလုံးဆိုရင် သိပ်ပြီးကြီးသွားလိမ့်မယ်။ မြန်မာနိုင်ငံအတွင်းမှာပဲ ဆန်းစစ်ကြည့်တာပေါ့။
မြန်မာနိုင်ငံမှာ–
(၁)။ ထေရ်ကြီးဝါကြီးဆရာတော်များအပါအဝင် ရဟန်းသံဃာနှင့်လူတွေ ကိုယ့်အလုပ်ကိုမလုပ်ဘဲ စည်းတွေဘောင်တွေကျော်လာကြရာက အပြန်အလှဆဲကြဆိုကြတဲ့ အကုသိုလ်ကာယကံဝစီကံမနောကံ ကံဆိုးများကိုနိုင်ငံနှင့်အဝန်း အားထုတ်နေကြခြင်း၊
(၂)။ ၂ နှစ်အရွယ်ကလေးငယ်ပါမကျန်ရ ကျယ်ကျယ်ပြန့်ပြန့် သက်ငယ်မုဒိန်းမှုဟူသော ကာယကံဝစီကံမနောကံ အကုသိုလ်ကံဆိုးများဖြစ်ပွားနေခြင်း၊
(၃)။ နိုင်ငံရေးဘာသာရေးလူမှုရေးပညာရေး စသည့်အရေးပေါင်းစုံတွင်လည်း မိုက်နိုင်သူများကအုပ်စုဖွဲ့၍ မိုက်နေမှန်းသိနေပါလျှက် ပြောမရဆိုမရ နိုင်ငံ၏ဝန်ထုပ်ဝန်ပိုးဖြစ်ကာ ဒုက္ခမျိုးစုံအကုန်ပေးသကဲ့သို့ဖြစ်နေခြင်း၊
(၄)။ တိုင်းပြည်တစ်ပြည်ရဲ့အဓိကကျသော တရားဥပဒေစိုးမိုးမှုသည် မြန်မာနိုင်ငံ၏အခြေအနေများစွာတွင် ကင်းမဲ့သလောက်ဖြစ်နေခြင်း စတဲ့သိသာမြင်သာသော အကုသိုလ်ကာယကံဝစီကံမနောကံ ကံဆိုးများကကျယ်ပြန့်စွာဖြစ်ပွါးနေခြင်း၊
အဲဒီလိုကံဆိုးတွေကြောင့် မြန်မာနိုင်ငံတွင် ရှေးကမဖြစ်ဘူးသော ရာသီဥတုဖောက်ပြန်ကာ ရေကြီးရေလွှမ်းမိုးမှုများ အကြီးအကျယ်ဖြစ်ပေါ်လာခြင်း၊ တောင်များကြောက်စရာကောင်းလောက်အောင်ပြိုကျခြင်း၊ တစ်ဦးနှစ်ဦးသာမဟုတ်ဘဲ ပြည်နယ်နဲ့ချီတိုင်းနှင့်ချီကာ ပျက်စီးဆုံးရှုံးမှုများဖြစ်ပေါ်နေခြင်း၊
အစားသောက်ဆိုရာတွင်လည်း စိတ်ချစရာမကောင်းလောက်အောင် အဆီအနှစ်များပျက်စီးနေခြင်း၊ မိမိစားနေသောအစားအစာသည် အားအင်ဖြစ်ရန်ထက် ကင်ဆာကဲ့သို့သော ရောကာဆိုးများကိုပင် ဖြစ်လေမည်လားဟု သံသယစိတ်ဖြင့်သတိထား၍ စားသုံးနေကြရခြင်း၊
စသည်တွေကိုကြည့်မယ်ဆိုရင် သတ္တဝါများရဲ့အကုသိုလ်ကာယကံဝစီကံမနောကံများသည် ရာသီဥတုနှင့်အစာအဟာရအပေါ် တိုက်ရိုက်သက်ရောက်မှုရှိနေကြောင်းကို အထင်အရှားတွေ့ရပေလိမ့်မည်။
ထို့ကြောင့်ထိပ်ပိုင်းခေါင်းဆောင်များကစလို့ ချစားလာဘ်စားကင်းစင်အောင်နေထိုင်ကြမည်။ ငါးပါးသီလကိုခါးဝတ်ပုဆိုးကဲ့သို့ မြဲအောင်စောင့်ထိမ်း၍ ဥပုသ်သီလရက်ရှက်စောင့်ထိမ်းကြမည်။ ရဟန်းသံဃာကို ရဟန်းသံဃာလိုသာ စစ်မှန်စွာကြည်ညိုကြကာ လိုတမျိုးမလိုတမျိုး ကောက်ကျစ်ယုတ်မာစွာ အသုံးမချဘဲနေကြမည်။
ရဟန်းသံဃာကလည်း ရဟန်းသံဃာရဲ့ပဓာနအလုပ်ကိုသာ ကြိုးစားအားထုတ်ကြပြီး သီလသမာဓိပညာ သိက္ခာသုံးပါးကိုသာ ကောင်းစွာ ဖြူစင်အောင်စောင့်စည်းကြမည်ဆိုက ရာသီဥတုဖေါက်ပြန်မှုဘေးဆိုးမှ လွတ်မြောင်နိုင်ပေလိမ့်မည်။
အစာအဟာရများလည်း အဆီသြဇာပြန်၍ ပြည့်ဝလာပေလိမ့်မည်ဟု ဒါယကာမေးသေမေးခွန်းကို ဤမျှဖြင့်သာကျေနပ်ပါရန် ပြောဆိုပါရစေ။ အခြားလုပ်စရာများကလည်းရှိနေသေးတော့ ဒီလောက်ပဲရမှာပါ။ အဆင်ပြေမယ်ထင်ပါတယ်။
မေး။ ။ အား–တင်ပါးဘုရား။ အတိုင်းထက်အလွန်အဆင်ပြေပါတယ်ဘုရား။ ဆရာတော်တို့လိုခေတ်ကိုလည်းမျှော်မြင်တတ် ကျမ်းစာကိုလည်းနိုင်နင်းတတ်မြောက်တဲ့ ဆရာတော်များရဲ့ အဖြေမျိုးဆိုတာ တပည့်တော်တို့ လူသားတွေအတွက် အလွန့်အလွန်မှအကျိုးများလှပါတယ်ဘုရား။

အမေးအဖြေကဏ္ဍအရေးကြီးလှပုံ
အမေးအဖြေကဏ္ဍအရေးကြီးလှပုံ (သေချာဖတ်စေချင်ပါသည်။ မရေးမဖြစ်မှိုအဖြေရှည်နေပါသည်။ သည်းခံစိတ်ရှည်စွာဖတ်ကြပါကုန်။)
ကျေးဇူးရှင်မဟာဂန္ဓာရုံဆရာတော်ဘုရားကြီးအရှင်ဇနကာဘိဝံသရှိစဉ်ကလည်းအမေးအဖြေကဏ္ဍရှိခဲ့သလို အခု ဘုန်းဘုန်းတို့ခေတ်မှာလည်း အမေးအဖြေကဏ္ဍကရှိလာပြန်ပါတယ်။ ရှေးတုန်းကတော့ မေးခွန်းစာတွေက စာတိုက်ကနေလာပါတယ်။ အခုခေတ်တော့ internet email မှလာပါတယ်။
မေး။ ။ “အရှင်ဘုရား လက်ရှိဆရာတော်ကြီးတွေခုတစ်မျိုးတော်ကြာတစ်မျိုးဖြစ်ကြတာဘာကြောင့်လဲဘုရား။ ဘုရားတပည့်တော်များမှာ ကိုယ့်နိုင်ငံစနစ်တကျ အပြောင်းအလဲအတွက် အမေစုဆိုတဲ့မျှော်လင့်ချက်နဲ့ အမေ့ကိုအားအင်တွေဖြည့်ဆည်းပေးပြီး စိတ်ကောင်းစေတနာဖြင့်ကြိုးစားနေကြရပါတယ်ဘုရား။ ဆရာတော်သံဃာတော်များဆီက မေတ္တာအားအင်လည်းလိုအပ်ပါတယ်ဘုရား။ ဒါပေမဲ့ဆရာတော်များက အမေစုကိုဆန့်ကျင်သလိုဖြစ်တဲ့အခါ တပည့်တော်များစိတ်မကောင်းကြီးစွာဖြစ်ရပါတယ်ဘုရား။ သေချာတာကတော့ အမေစုဟာနိုင်ငံရေးကိုကစားစရာအဖြစ် မကစားဘူး။ ပြီးတော့ဆရာတော်များကိုလည်း ဘယ်တော့မှနိုင်ငံရေးအတွက် အသုံးမချဘူးဆိုတာကိုရဲရဲပြောနိုင်ပါတယ်ဘုရား။ ခုသိချင်နေတာကတော့ အထက်ကမေးခဲ့တဲ့မေးခွန်းပါပဲဘုရား။ ကျေးဇူးပြု၍ အချိန်ရရင်ဖြေတော်မူပေးပါဘုရား ဆိုတဲ့မေးခွန်းကို ရထားပါတယ်။ အခုအချိန်မရလို့ မဖြေနိုင်သေးပါ။ ဖြေပေးပါမည်။
ဖြေ။ ။ ဒီမေးခွန်းမှာ နှစ်ပိုင်းတွေ့ရပါတယ်။ ပထမတစ်ပိုင်းက “လက်ရှိအခြေအနေမှာ ဆရာတော်ကြီးတွေ ဘာဖြစ်လို့ခုတစ်မျိုးတော်ကြာတစ်မျိုးဖြစ်ရတာလဲ”ဆိုတဲ့အပိုင်း။ ဒုတိယပိုင်းက အမေစုဟာ ဒကာတို့ရဲ့မျှော်လင့်ချက်၊ အမေစုနိုင်ငံရေးမကစားပုံ၊ သံဃာတွေကိုအသုံးမချပုံကို ဒကာတို့က ရဲရဲအာမခံနိုင်ပုံဆိုတာကိုတွေ့ရတယ်။
ပထမပိုင်းမေးခွန်းထဲမှာ လက်ရှိအခြေအနေအနေမှာ ဆရာတော်ကြီးတွေ တော်ကြာတစ်မျိုးအခုတစ်မျိုးဖြစ်ရတာ ဘာကြောင့်လဲဆိုတော့ အဲဒီတော်ကြာတစ်မျိုးအခုတစ်မျိုးဖြစ်ရတာဟာ ဖြစ်စဉ်တစ်ခုနှင့်ပါတ်သက်လို့ မူနဲ့ဦးတည်ချက်အခိုင်အမာမရှိလို့ဖြစ်ရတာပါ။ မူနဲ့ဦးတည်ချက်ခိုင်မာရင်အဲဒီအပေါ်မှာ ယုံကြည်မှုအပြည့်ဖြင့်ရပ်တည်လုပ်ကိုင်လျှောက်လှမ်းနေမယ်ဆိုရင် တော်ကြာတစ်မျိုးအခုတစ်မျိုးဖြစ်စရာအကြောင်းမရှိပါဘူး။
နောက်တစ်ခုဖြစ်နိုင်တာက ကိုယ့်ကျွမ်းကျင်ရာလိမ္မာရာမှာသာ ကျက်စားလုပ်ကိုင်သင့်ပါတယ်။ ကိုယ့်ကျွမ်းကျင်ရာလိမ္မာရာမဟုတ်ရင်လည်း သူများယောင်လို့ယောင်မိတော့ တောင်မှန်းမြောက်မှန်းမသိဘဲ ခုတစ်မျိုးတော်ကြာတစ်မျိုး မကြာမကြာဖြစ်တတ်ပါတယ်။ ပြီးတော့ “ဆန္ဒာဒေါသာ ဘယာမောဟာ”ဆိုတဲ့ အဂတိလေးပါးလိုက်စားမိလို့လည်း ခုတစ်မျိုးတော်ကြာတစ်မျိုးဖြစ်တတ်ပါတယ်။
ချစ်ခြင်းကြောင့်ဘက်လိုက်ခြင်း၊ မုန်းခြင်းကြောင့်ဘက်လိုက်ခြင်း၊ ကြောက်ရွံ့ခြင်းကြောင့်ဘက်လိုက်ခြင်း၊ မသိမလိမ္မာတွေဝေမိုက်မဲသောကြောင်းဘက်လိုက်ခြင်းတွေကို အဂတိလေးပါးလို့ခေါ်ပါတယ်။ အဲဒီအဂတိလေးပါးလိုက်စားမယ်ဆိုရင်တော့ ခုတစ်မျိုးတော်ကြာတစ်မျိုးခဏခနကိုဖြစ်တတ်ပါတယ်။ ဒီတော့သူ့ကိုယုံကြည်လေးစားကြည်ညိုသူတွေက အကြည်ညိုမဲ့လာတတ်ပြီး သူ့ကိုထောက်ခံနေရာကနေ ဆဲဆိုမောင်းမဲတာတွေ ဝေဖန်အပြစ်တင်တာတွေဖြစ်လာတတ်ပါတယ်။ ဒါဟာသဘာဝပါပဲ။
ဒီတော့ လက်ရှိမှာဆရာတော်ကြီးတွေဘာကြောင့် ခုတစ်မျိုးတော်ကြာတစ်မျိုးဖြစ်ကြရသလဲဆိုတာကိုလေ့လာကြည့်ရင် ဆိုခဲ့တဲ့အချက်တွေထဲက တစ်မျိုးမျိုးနဲ့သူတို့ငြိနေလို့ဖြစ်ပါတယ်။ သို့သော်လည်းဆရာတော်ကြီးများအနေနဲ့ တော်ကြာတစ်မျိုးအခုတစ်မျိုး စကားတွေကိုမပြောသင့်ပါဘူး။ အဂတိလေးပါးလည်း မလိုက်စားသင့်ပါဘူး။ “သီလသမာဓိပညာ” အားကောင်းခိုင်မာရပါမယ်။ “မေတ္တာကရုဏာမုဒိတာဥပေက္ခာ”လို့ဆိုတဲ့ ဗြဟ္မဝိဟာရတရားလေးပါးကို အခိုင်အမာလက်ကိုထားရပါမယ်။
မေတ္တာဆိုတာက မိတ်ဆွေရန်သူမခွဲခြားပဲ အညီအမျှချစ်နိုင်ပြီး အညီအမျှကောင်းကျိုးချမ်းသာဖြစ်ဖို့လိုလားတဲ့ ကာယကံ ဝစီကံ မနောကံကို ဆိုလိုတာပါ။ ကရုဏာဆိုတာကတော့ ဒုက္ခိတသတ္တဝါတွေကိုကြည့်ပြီးစိတ်နှလုံးတုန်လှုပ်စွာဖြင့် သူတို့တွေချမ်းသာအောင် ကာယကံဝစီကံမနောကံဖြင့် ကူညီဖေးမစောင့်ရှောက်ပေးတာကို ဆိုလိုပါတယ်။ မုဒိတာဆိုတာကတော့ ကိုယ့်ထက်အောင်မြင်ချမ်းသာကြီးပွားနေသူတွေကို ကြည့်ပြီးဝမ်းမြောက်နေတတ်တဲ့ ကာယကံ ဝစီကံ မနောကံစေတနာတွေကိုဆိုလိုတာပါ။
ဥပေက္ခာဆိုတာကတော့ ကိုယ့်ကဘယ်လောက်ပင် မေတ္တာကရုဏာမုဒိတာတရားတွေနဲ့ ဆက်ဆံပြုမူဆောင်ရွက်ပေမဲ့ ဘာမှကိုလုပ်လို့မရဘဲဖြစ်နေတတ်တဲ့အခြေအနေမျိုးတွေရှိလာတတ်ပါတယ်။ အဲဒီအခါကျတော့ “အင်း–မတတ်နိုင်တော့ဘူးလေ ငါလည်းအစွမ်းကုန်ကြိုးစားပေးတာပဲ ဒါပေမဲ့ဘာမှဖြစ်မလာတော့လည်း သဗ္ဗေသတ္တာ ကမ္မဿကာ ပေါ့။ ကံစီမံတဲ့အတိုင်းလက်ခံဖို့ပဲ”လို့ ကံတရားကိုဆင်ခြင်ကာ ဖြစ်နေတဲ့အခြေအနေအရပ်ရပ်ကို ဥပေက္ခာစိတ်နဲ့သာ အဆင်ပြေအောင်ကြိုးစားနေထိုင်တာကိုဆိုလိုတာပါ။
သူတော်ကောင်းတွေရဲ့အသွင်အပြင်ကို ရယူထားတဲ့ရဟန်းသံဃာမှန်သမျှဟာ ဆရာတော်ကြီးတွေရော ဆရာတော်လေးတွေရော ဒီဗြဟ္မစိုရ်တရားလေးပါးကို မဖြစ်မနေကျင့်သုံးရမှာပါ။ ဒီဗြဟ္မစိုရ်တရားလေးပါးကို စနစ်တကျကျင့်သုံးနေတဲ့ ဆရာတော်ကြီးတွေပဲဖြစ်စေ ဆရာတော်လေးတွေပဲဖြစ်ဟာ ဘယ်လိုလုပ်ပြီးအဂတိလိုက်စားလို့ရမလဲ။ အခုတစ်မျိုးတော်ကြာတစ်မျိုး လုပ်လို့ရမလဲ။
သူတော်ကောင်းအစားစားရဲ့ကြည်ညိုလေးစားပူဇော်သမူကိုခံယူကြရမှာပါ။ အခုဟာက အဂတိလေးပါးတစ်ပါးပါးကိုလိုက်စားမိလို့ သို့မဟုတ် ကိုယ့်ရဲ့ကျွမ်းကျင်ရာဘာသာရပ်မဟုတ်သည်ကို ဝင်ရှုပ်မိလို့ ခုတစ်မျိုးတော်ကြာတစ်မျိုးဖြစ်ကြတာကများတယ်လို့ထင်ပါတယ်။
😍ဒါနဲ့ပတ်သက်လို့ ဘုန်းဘုန်းရဲ့ စင်္ကာပူဓမ္မခရီးစဉ်ကရခဲ့တဲ့ ကိုယ့်တွေ့သင်္ခန်းစာတစ်ခုကိုပြောပြချင်ပါတယ်။ ဘုန်းဘုန်း ပြီးခဲ့တဲ့ ၂၀၁၈ နိုဝင်ဘာလမှာ စင်္ကာပူနိုင်ငံကို ဘုန်းဘုန်းနဲ့ဆရာဒကာဖြစ်တဲ့ စင်္ကာပူလူမျိုးဆရာဝန်လင်မယားက ဓမ္မခရီးစဉ်အဖြစ်ပင့်ပါတယ်။ သူတို့လင်မယားနဲ့ သူတို့ရဲ့မိတ်ဆွေတွေဟာ ဘုန်းဘုန်းရေးတဲ့ စာအုပ်တွေအကုန်ဖတ်ပြီးကြည်ညိုစိတ်ဖြစ်ရာကနေ ပင့်လိုက်တာပါပဲ။
ဒါပေမဲ့သူတို့ကဆရာဝန်ဆိုတော့ ဘာသာရေး အသိုင်းအဝိုင်းသိပ်မရှိဘူး။ ဒီတော့သူတို့ Buddhist Fellowship ဆိုတဲ့ဗုဒ္ဓဘာသာအဖွဲ့အစည်းတစ်ခုရယ် မင်္ဂလာဝိဟာရဆိုတဲ့ ကျောင်းတိုက်တစ်ခုရယ်နဲ့ ဆက်သွယ်ပြီး organize လုပ်ကြပါတယ်။ မင်္ဂလာဝိဟာရမှာတော့ မြန်မာသံဃာများက ဦးစီးဦးဆောင်နေရာမှာ ရှိပြီးဖြစ်နေတော့ အခက်အခဲမရှိလှပါဘူး။
Buddhist Fellowship မှာကြတော့ အတွင်းရေးမှူးဖြစ်တဲ့ဒကာတော်က “အရှင်ဘုရား တပည့်တော့တို့စင်္ကာပူဆိုတာက နိုင်ငံပေါင်းစုံနဲ့အလုပ်လုပ်ရပါတယ်ဘုရား။ အခုတလောမှာ မြန်မာဗုဒ္ဓဘာသာတွေနဲ့ ရခိုင်ပြည်နယ်ကမွစ္စလင်တွေရဲ့အရေးဟာ တစ်ကမ္ဘာလုံးကိုရိုက်ခတ်သလို တပည့်တော်တို့စင်္ကာပူကိုလည်း ရိုက်ခတ်ပါတယ်ဘုရား။ တပည့်တော်တို့ hate speech ကိုလက်မခံပါဘူးဘုရား။ အရှင်ဘုရားရောအဲဒီအရေးကို ဘယ်လိုရှုမြင်ပါသလဲဘုရား”လို့ မေးမြန်းလျှောက်ထားပါတယ်။
ဒီတော့ဘုန်းဘုန်းက “ဒကာတော်ရေ အဲဒီရခိုင်အရေးဟာ ဘုန်းဘုန်းရဲ့ဘာသာရပ်ဆိုင်ရာမဟုတ်ပါဘူး။ ဘုန်းဘုန်းစိတ်လည်းမဝင်စားသလိုကျွမ်းလည်းမကျွမ်းကျင်ပါဘူး။ ဒါကကျွမ်းကျင်သူတွေဖြေရှင်းရမည့်ကိစ္စတစ်ခုပါ။ ဘုန်းဘုန်းစိတ်ဝင်စားတာက ဓမ္မသက်သက်နဲ့တရားထိုင်မူသာဖြစ်တယ်။ ဘုန်းဘုန်းကို ဒီစင်္ကာပူကိုပင့်ဆောင်စဉ်ကလည်း တရားဟောတရားပြတရားထိုင်ကြဖို့ပင့်ခဲ့ကြတာပဲ။
ဘုန်းဘုန်းစင်္ကာပူသားတွေကို ဘုန်းဘုန်းအသွေးအသားလိုစိတ်ထားပြီး တရားဟောတရားပြတရားအားထုတ်နည်းတွေစုံအောင်သင်ပြပေးမယ်။ နေ့စဉ်ဘဝထဲအထိတရားအားထုတ်နိုင်အောင် နည်းပေါင်းစုံပြပေးမယ်လို့ မေတ္တာကြီးကြီးဖြင့်ကြွလာခဲ့တာပါ။
ဒီတော့ ဘုန်းဘုန်းရဲ့ဘာသာရပ်ဆိုင်ရာကိုသာမေးပါ။ ဘာသာရပ်နဲ့မဆိုင်တာတွေကို မမေးပါနဲ့”လို့ မယိမ်းမယိုင် အခိုင်အမာရပ်တည်ပြီးဖြေရှင်းပေးလိုက်တဲ့အခါ ချက်ချင်းသဘောကျလက်ခံသွားပြီး ငြိမ်းချမ်းတဲ့တရားကိုနာယူကြ၊ လိုလားစွာကျင့်သုံးကြပါတယ်။ နောက်ထပ်လည်း ၂ ရက်တရားစခန်း သုံးရက်တရားစခန်းတွေထပ်တိုးလာပါတယ်။ နှစ်ပါတ်ကြာဓမ္မခရီးစဉ်တစ်ခုဖြစ်ပါတယ်။
ဒါဟာ ကိုယ့်ကိုကိုယ်ယုံကြည်မှု self-confidence ဖြင့် ကိုယ့်ဘာသာရပ်ကိုယ် အခိုင်အမာရပ်တည်နိုင်တဲ့ခိုင်မာပြတ်သားတဲ့ စိတ်နေစိတ်ထားကြောင့်ပါပဲ။ ဆိုလိုတာက ကိုယ်လုပ်မည့် ကိုယ်ကျွမ်းကျင်ရာပဓာနအလုပ်အပေါ်အခြေခိုင်စွာမရပ်တည်ပဲ ဟိုထဲစပ်စပ်ဒီထဲစပ်စပ်ပါမိပြီဆိုရင်တော့ မလိုအပ်တဲ့ conflict တွေ contradiction ဖြစ်လာတတ်တာ သဘာဝတရားပါဘဲ။
ဒါကြောင့် ဘုန်းဘုန်းတစ်ပါးတည်းရဲ့အမြင်အတိုင်းဆိုရင်တော့ ရဟန်းသံဃာဟာ ဆရာတော်ကြီးတွေပဲဖြစ်စေ ဆရာတော်လေးတွေပဲဖြစ်စေ ကိုယ့်ရဲ့ပဓာနအလုပ်ဖြစ်တဲ့ ပရိယတ္တိ ပဋိပတ္တိ အလုပ်နှစ်ခုကို အခုခေတ်သိပ္ပံပညာ စိတ်ပညာ ဒဿနိကပညာရပ်တွေနဲ့ နှိုင်းယှဉ့်လေ့လာသုတေသနတွေပြုနိုင်အောင်ကြိုးစားကြပြီး လူသားတိုင်းအကျိုးရှိမည့် သာသနာပြုအလုပ်တွေကိုသာလုပ်စေချင်ပါတယ်။
ကိုယ်မကျွမ်းကျင်ရာတွေမှာ လိုက်ပြီးမပါစေချင်ပါဘူး။ မလိုအပ်တဲ့ရှုပ်ထွေးမှုတွေမဖြစ်စေချင်လို့ပါ။
မြန်မာနိုင်ငံရဲ့လက်ရှိအခြေအနေဟာ ရှုပ်ထွေးပါတယ်။ monastic institution နဲ့ military instruction နှစ်ဟာ နိုင်ငံရေးကိစ္စတွေထဲမှာ ပါဝင်ပြီးရောထွေးယှက်တင်ဖြစ်နေတာက လက်ရှိနိုင်ငံရေးကိုပိုပြီးရှုပ်ထွေးစေပါတယ်။ ဘုန်းဘုန်းကိုယ်တိုင်ကတော့ professional အလုပ် ပဓာနအလုပ်ဖြစ်တဲ့ ပရိယတ်ပဋိပတ်အလုပ်ကို ပြည်တွင်းမှာရော ပြည်ပမှာပါ professionally ရိုးသားစွာကြိုးစားနေပါတယ်။ အားလုံးလူမျိုးဘာသာအသွေးအရောင်မခွဲချမ်းသာစေဖို့ပါ။ ဒီလောက်ဆို ဒကာတော်ရဲ့မေးခွန်းက ပြေပြီထင်ပါတယ်နော်။
မေး။ ။ တင်ပါဘုရား။ ကျေးဇူးကြီးပါတယ်ဘုရား။ အမေစုနဲ့ပတ်သက်လို့လည်း အရှင်ဘုရားရဲ့အမြင်လေးကိုသိပါရစေဘုရား။
ဖြေ။ ။ ဒကာမကြီးနဲ့ပတ်သက်လို့ကတော့ ပညာတတ်ပညာရှင် သူတော်ကောင်းနှလုံးသားရှိသူမှန်သမျှ သာဓုခေါ်စရာအလုပ်တွေ သမိုင်းတွင်မည့်အလုပ်တွေကိုလုပ်နေတယ်ဆိုတာ ထင်ရှားနေတာပဲ။ ခက်ခဲကြမ်းတမ်းလှတဲ့အချိန်တွေကနေ အခုအချိန်အထိပေါ့။ အမျိုးကောင်းတယ်။ စိတ်ရှင်းတယ်။ စိတ်ရင်းစေတနာမှန်တယ်။ ဖြူစင်ရိုးသားမှုရှိတယ်။ ပြည်သူပြည်သားအပေါ်စေတနာအမှန်ထားတယ်။
ဒီလိုလူမျိုးလုပ်တဲ့အလုပ်တွေဟာ မှားခဲ့သည်ရှိဦးတော့စေတနာအမှားသာဖြစ်မှာပါ။ ဒီလောက်ဆိုရင် ရပြီထင်ပါတယ်။ နောက်ထပ်မြန်မာပြည်မှာ ဒကာမကြီးလို ခေါင်းဆောင်မျိုးရဖို့လွယ်မယ်ထင်ပါဘူး။ စိတ်ရင်းကောင်းနိုင်တယ်။ အနစ်နာခံနိုင်တယ်ဆိုဦးတော့ နိုင်ငံတကာအသိုင်းအဝိုင်းရဲ့ နှလုံးသားတွေအထိဖမ်းစားနိုင်တဲ့အစွမ်းကြတော့ ဒကာမကြီးဒေါ်အောင်ဆန်းစုကြည်ကိုမီဖို့မလွယ်ဘူးထင်ပါတယ်။ ကဲ–ရပြီထင်တယ်။
မေး။ ။သာဓု သာဓု သာဓု ပါဘုရား။ ကျေးဇူးအရမ်းကြီးပြီးကျေးဇူးလည်းအများကြီးတင်ပါတယ်ဘုရား။
=================================================================

Comments
-
Paung Aike တပည့္ေတာ္ဖတ္ရတာ၊အင္မတန္မွ၊ေက်နပ္အားရမိပါတယ္ဘုရား၊
ဆရာေတာ္၊က်န္းမာခ်မ္းသာပါေစ။
-
Maybelle Wang ျမန္မာျပည္ကရဟန္းရွင္လူအားလံုး professional ဆိုတဲ့ ကိုယ့္အလုပ္ကိုကၽြမ္းက်င္စြာလုပ္ျခင္းကို ရွင္းရွင္းလင္းလင္းနားမလည္ေသးသမွ် မလိုလားအပ္တဲ့ ထိပ္တိုက္ေတြ႕မွဳ၊ ပြတ္တိုက္မွဳေတြျဖစ္ေနအံုးမယ္လို႔ ထင္ပါတယ္ဘုရား။
-
ဆုလာဘ္ ေထြး ဦးတာ ပညာရွိစကား ၾကားနာခြင့္ရလို႔ ေက်းဇူးအထူးတင္ပါတယ္ ဘုရား
သာဓု သာဓု သာဓုပါဘုရား🙏🙏🙏🙏🙏
-
Aye Mi San🙏🙏🙏
-
Phyu Phyu Htaik 🙏🙏🙏🙏🙏
-
Khin San Win အရွင္ဘုရား ျမတ္စြာဘုရား၏ ဓမၼအေပါ္ရပ္တည္ရွင္းလင္းျပေပးတဲ႔အတြက္ သာဓု သာဓု သာဓုပါဘုရား
shareခြင့္လည္းျပုပါဘုရား
-
ေမကဆုန္ အစဥ္ေလးစားၾကည္ညိဳဦးခိုက္ပါ၏အ႐ွင္ဘုရား
သီလသမာဓိပညာသိက္ခာသုံးပါးသည်သာ ရဟန်းသံဃာအားထုတ်စရာ
သီလသမာဓိပညာသိက္ခာသုံးပါးသည်သာ ရဟန်းသံဃာအားထုတ်စရာ ================================================
မြန်မာ့ထေရဝါဒ သံဃာ့အသိုင်းအဝိုင်းသည် သီလသမာဓိပညာကို အခြေမခံနိုင်သေးသမျှ ကမ္ဘာ့ပညာတတ်ဝိနည်းလေးစားသော ထေရဝါဒသံဃအသိုင်းအဝိုင်းနှင့် အံဝင်ခွင်ကြဖြစ်မည်မဟုတ်သေးပေ။ မြန်မာ့ထေရဝါဒကမ္ဘာပေါက်နိုင်မည်မဟုတ်သေးပေ။
ဒီနေ့ကမ္ဘာ့ထေရဝါဒသံဃာ့အသိုင်းအဝိုင်းသည်ကား အမှန်တကယ်စွန့်လွှတ်စွန့်စား၍ သူတို့ယုံကြည်ရာဘာသာတရားနှင့် အစဉ်အလာကိုပစ် မိဘဆွေမျိုးကိုပစ်ကာ ဓမ္မဝိနယသာသနာတော်အတွက် စွန့်လွှတ်ခဲ့ကြရသော ပညာတတ်အမျိုးကောင်းသားသမီးများကဦးဆောင်ဦးရွက်ပြုနေကြခြင်းတည်း။
ထိုကြောင့်သူတို့တွေတွေးပုံခေါ်ပုံသည် ဗုဒ္ဓသာသနာဖြစ်သောဓမ္မဝိနယသာသနာတော်ကို သူတစ်ပါးအား ဖြန့်ဝေဖို့ထက်သူတို့ကိုယ်တိုင်ကျင့်ကကံအားထုတ်လို၍ သာသနာ့ဘောင်ဝင်ကာကျင့်ကြံအားထုတ်ခြင်းဖြင့် နေထိုင်ကြခြင်းသည် အများပြည်သူကိုပါစိတ်ဝင်စားစေခဲ့ပြီး ပိုမိုကြယ်ပြန့်လာခြင်းတည်း။
မိမိတို့ရွှေမြန်မာရဟန်းသံဃာအသိုင်းအဝိုင်း၏ တွေးပုံခေါ်ပုံကား ကိုယ်ကျင့်ကြံအားထုတ်ဖို့ထက် သူတစ်ပါးကိုသာသင်ပြပေးဖို့ကျိုးစားနေခြင်းကသာများပေ။ ဝိနည်းဆိုလျှင်လည်း ဘယ်တစ်ခုကိုမျှတိတိကျကျမလိုက်နာဘဲ အဆင်ပြေသလိုကျင့်နေသည်ကများ၏။ ထို့ကြောင့် ကမ္ဘာ့သံဃာ့အသိုင်းအဝိုင့်နှင့် အတွေ့အထိရှိသော မိမိအနေဖြင့်ကား ကမ္ဘာ့ပညာတတ်လူကြီးလူကောင်းသံဃာ့အသိုင်းအဝိုင်းနှင့် ရွှေမြန်မာထေရဝါဒအသိုင်းအဝိုင်းကြားညကွာခြားချက်ကိုရှင်းလင်းစွာ မြင်နေရပေ၏။
ကမ္ဘာ့ထေရဝါဒအသိုင်းအဝိုင်းသည် တရားဥပဒေကိုလိုက်နာတတ်သောပညာတတ်များဖြစ်ပေ၏။ စည်းကမ်းဥပဒေကိုစည်းကမ်းဥပဒေအတိုင်း လိုက်နာတတ်သောယဉ်ကျေးမှုထွန်းကားသော တိုးတက်ဖွံ့ဖြိုးပြီးနိုင်ငံများမှ အမျိုးကောင်းသားသမီးများဖြစ်ပေ၏။
ဥပမာ။ ။ငွေမကိုင်ရဆိုလျှင်လုံးဝမကိုင်တွယ်ဘဲလိုက်နာကြ၏။ ဝိနည်းကိုဝိနည်းအတိုင်းလိုက်နာတတ်ကြပေ၏။ မိမိနှင့်နှစ်ပေါင်းများစွာနေထိုင်ခဲ့သော ဝါရှင်တန်ဒီစီသား အမေရိကန်လူမျိုးရဟန်းတော်ဦးပညောဘာသဆိုလျှင် အာပတ်ဖြေသည်ကိုပင် “အဟံ ဘန္တေ သဗ္ဗာ အာပတ္တိယော အာဝိကရောမိ”ဟု ရောပြွန်းသပြွန်း အာပတ်ဖြေနည်းကိုလုံးဝမနှစ်သက်ပေ။
ထို့ကြောင့် သူ့အတွက် အာပတ်ဖြေနည်း သီးသန့်လုပ်ပေးထားရပေ၏။ သူသည် အပြစ်မသင့်အောင်လည်းကြိုးစားနေထိုင်၏။ အပြစ်သင့်သည်ဟုထင်ရှားလျှင်လည်း သင့်ရောက်သည့်အပြစ်ကို “အဟံ ဘန္တေ ဒုက္ကတံ အာပတ္တိံ အာဝိကရောမိ၊ ပါစိတ်တိယံ အာပတ္တိံ အာဝိကရောမိ” စသည်ဖြင့် အပြစ်ကိုအပြစ်အတိုင်း ဖေါ်ပြောသည့် အာပတ်ဖြေဒေသနာပြောနည်းကို စီမံပေးထားရပေ၏။
ဝိနည်းသိက္ခာနှင့်အညီနေထိုင်လိုက တောရဆောက်တည် ရွှေငွေမကိုင်ဘဲ သာရေးနာရေးပွဲလည်းမသွား ခရီးသွားလည်းကျဲကာနေထိုင်ခြင်းကသာ ဖြူစင်နိုင်ပေ၏။ သို့မှသာလူ့တို့စိတ်ထဲ စွဲမြဲသောသာသနာ့အနှစ်သာရများရောက်ရှိကာ သာသနာအစစ်တည်နိုင်ပေ၏။
မိမိသည် သာသနာ့အကျိုးနိုင်ငံအကျိုးကိုရှေ့ရှုလျက် တောရဆောက်တည်ကျင့်သုံးနေသော နိုင်ငံခြားတိုင်းပြည်များသို့လည်း ဝိနည်းနှင့်အညီ တရားဟောတရားပြ ပင့်ဖိတ်သောနိုင်ငံများသို့ သွားလာနေရသော မြန်မာဆရာတော်တစ်ပါးဖြစ်ပေ၏။
အထူးသဖြင့်အနောက်နိုင်ငံထေရဝါဒသံဃာ့အဖွဲ့အစည်းနှင့် တွေ့ထိမှုရှိထားသောမြန်မာဆရာတော်ဖြစ်၍ မြန်မာ့သံဃာ့အဖွဲ့အစည်း၏ ဓမ္မဝိနယကျင့်ကြံအားထုတ်မှု အားနည်းနေသည်ကို ကိုတိုင်တွေ့ကြုံရကာ သိရှိထားသောဆရာတော်ဖြစ်ပေ၏။
အချို့အနောက်နိုင်ငံထေရဝါဒသံဃာ့အသိုင်းအဝိုင်းသည် မြန်မာ monk တွေနောက်လိုက်ရင် ဝိနည်းမှာ အသက်ရှူပေါက်များသည်ဟုပင်ဆိုကြပေ၏။ ဆိုလိုသည်မှာ မြန်မာသံဃာ့အသိုင်းအဝိုင်းသည် သိက္ခာပုဒ်များကိုလိုက်နာရာ၌အလွန်အားနည်း၏ဟု ဆိုခြင်းတည်း။ ဤကားအနောက်နိုင်ငံရဟန်းသံဃာ၏ မြန်မာ့သံဃာ့အဖွဲ့အစည်းအပေါ်အမြင်တည်း။
ထို့ကြောင့်မိမိသည် ရဟန်းငယ်စာသင်သားဘဝကတည်းက အပြောအဆိုမခံလို၍ ဓမ္မဝိနယနှစ်မျိုးလုံးကို ကောင်းစွာအားထုတ်ခဲ့ပေ၏။ ယခုအခါမိမိ၏ရဟန်းဝါပင် ၂၉ ဝါရ၍ တောရဝါဆောက်တည်သောဝါပင် ၁၇ ဝါသို့ရောက်လာလေပြီ။ ဆက်၍လည်း သေသည့်တိုင်အောင်အားထုတ်နေရပေဦးမည်။
ယခုအခါ သက်တော် ၅၀ ကျော်လာ၍ သေဖို့ပင်ပြင်ဆင်နေရပေပြီ။ ဘာရောဂါမျှမရှိသေးသည့်တိုင်အောင် Who knows? Things are so much conditioned and everything is changing so fast. Within a blink, and within a stretch of one’s hand, one can die so I try to purify my mind by mindfully living at the present moment and by teaching the same technique to people who want to come with me along the Path to Nibbāna. Everyone is every welcome to the Path on which I have been walking through.
သီလသမာဓိပညာ သိက္ခာသုံးပါးကို စနစ်တကျအားမထုတ်သေးသမျှကာလပတ်လုံး မြန်မာ့သံဃာ့အဖွဲ့အစည်းသည် မည်သို့ပင် PhD စသော ဘွဲ့ထူးဂုဏ်ထူးများတတ်ထားသည်ဖြစ်စေ ဝိနည်းကိုတရားဥပဒေကဲ့သို့လေးစားကြသော ဓမ္မဝိနယကိုဦးထိပ်ထားလျှက် တည်ငြိမ်စွာကျင့်ကြံအားထုတ်၍ ဖွံ့ဖြိုးလာနေပြီဖြစ်သော ကမ္ဘာ့ပညာတတ်လူကြီးလူကောင်း သံဃာ့အဖွဲ့အစည်းနှင့် အလှမ်းဝေးနေပေလိမ့်ဦးမည်ဟုသာမှတ်။
သိလိုသူများလေ့လာလို့ရအောင် ငယ်စဉ်ကတည်းကအခုအထိ ပြည်တွင်းပြည်ပ၌ရိုးသားစွာ သာသနာ့တာဝန်ထမ်းဆောင်မှုမှတ်တမ်းအချို့ကိုတင်ပြပေးလိုက်ရပေ၏။ ကြည်ညိုစိတ်မုဒိတာပွားနိုင်ကြပါစေသော်။
တရားထိုင်တာဟာ အကြာကြီးထိုင်ပြီးအားထုတ်ဖို့လိုအပ်ပါသလားဘုရား
မေး။ ။အရှင်ဘုရား အချို့ကဘယ်နှစ်နာရီထိုင်နိုင်တယ် ဘယ်နှစ်နာရီအထိ တင်ပလ္လင်ချိတ်နိုင်တယ် စသည်ပြောဆိုကြပါတယ်ဘုရား။ တပည့်တော်တို့ကတော့ အဲဒီလိုလုပ်နိုင်တဲ့ အစွမ်းမရှိပါဘူးဘုရား။ အရှင်ဘုရားအနေနဲ့လည်း ပြည်ပနိုင်ငံတွေမှာ ပြည်ပသားစစ်စစ်တွေကို တရားပြဖို့သွားလာနေတာကို တပည့်တော်တို့သိပါတယ်ဘုရား။ တရားထိုင်တာဟာ အဲဒီလိုအကြာကြီးထိုင်ပြီးအားထုတ်ဖို့လိုအပ်ပါသလားဘုရား။ သနားသောအားဖြင့်ဖြေကြားပေးတော်မူပါဘုရား။
ဖြေ။ ။အင်း-မေးခွန်းကတော်တော်လေးကိုကောင်းတယ်။ တကယ်တော့မြတ်ဗုဒ္ဓကအချိန်ဘယ်လောက်ကြာထိုင်ခြင်းဣရိယာပုထ်ဖြင့် အားထုတ်ရမယ်။ ဘယ်လောက်ကြာစင်္ကြံလျှောက်ခြင်းဣရိယာပုထ်ဖြင့် အားထုတ်ရမယ်။ ဘယ်လောက်ကြာလှဲလျှောင်းခြင်းဣရိယာပုထ်ဖြင့် အားထုတ်ရမယ်။ ဘယ်လောက်ကြာရပ်ခြင်းဣရိယာပုထ်ဖြင့် အားထုတ်ရမယ်လို့တော့ ရုပ်ဝါဒဆန်ဆန် အချိန်ကိုအဓိကထားပြီးာအားထုတ်ခိုင်းထားတာ ကျမ်းဂန်တွေမှာ မတွေ့ရပါဘူးကွယ်။
“သတော ဘိက္ခဝေ ဝိဟရေယျ သမ္ပဇာနော-သံသရာဘေးကိုကြောက်လန့်ကြတဲ့ ယောဂီသူတော်ကောင်းတို့ သတိထားပြီး ကောင်းစွာသိလျှက် ဣရိယာပုထ်လေးပါးတွင် မမေ့မလျှော့နေထိုင်ရာ၏”လို့သာ မိန့်မှာထားတာကို ကျမ်းဂန်အတော်များများမှာတွေ့ရပါတယ်။ ဒီတော့ ဘုန်းဘုန်းတို့ပြည်ပမှာဆိုရင် “You have to be closely mindful of everything by sitting, by walking, by standing and by reclining for 24/7.”လို့ပြောပေးရပါတယ်။
ဒီတော့ တရားစခန်းတွေမှာဆိုရင် ဣရိယာပုထ်လေးပါးလုံးမှာ ၂၄ နာရီပတ်လုံး တတ်နိုင်သမျှမမေ့မလျှော့နေတတ်အောင်တော့ အသေးစိတ်သင်ပြပေးရပါတယ်။ ဒါဟာဗုဒ္ဓသင်ပြတော်မူတဲ့ကျင့်စဉ်အစစ်ပါ။ အထူးသဖြင့် ပြည်ပနိုင်ငံတွေမှာ ပြည်ပသားစစ်စစ်တွကို တရားစခန်းဖွင့်ပြီးသင်ပြပေးရတဲ့အခါ ပြည်တွင်းမှာလိုယုံကြည်မှုနဲ့လုပ်ကြတာမျိုးမဟုတ်ဘဲ အသိဉာဏ်ဆင်ချင်တုံတရား သိပ္ပံနည်းကျမကျစတဲ့ပေတံတွေနဲ့ တိုင်းတာကြတာဖြစ်လို့ ပြည်တွင်းကအစဉ်အလာသင်ပြမှုထက် ဗုဒ္ဓလိုလားတော်မူတဲ့အတိုင်း ကျမ်းဂန်နဲ့ညီအောင်သင်ပြရပါတယ်ကွယ်။
သိပ္ပံပညာသိပ္ပံဦးနှောက်တွေနဲ့လည်းဆီလျှော်မှုရှိအောင်သင်ပြရပါတယ်။ ဒါပေမဲ့သေချာတာကတော့ ဓမ္မကိုယ်တိုင်ကသိပ္ပံနည်းကျပြီးသားပါ။ ပြည်တွင်းမှာသိပ္ပံပညာအားနည်းတော့ တရားအားထုတ်တဲ့အခါမှာလည်း အစဉ်အလာနည်းတွေကိုပဲ လွယ်ကူစွာလက်ခံပြီးလိုက်လုပ်ကြတာများပါတယ်။ ဒီတော့ပြည်တွင်းမှာ အခက်အခဲသိပ်မရှိဘူးလက်ခံသူတွေကလည်း တရားစခန်းတရားပြဆရာရဲ့ popular ဖြစ်မှုအတိမ်အနက်ပေါ်မူတည်ပြီး အလွယ်တကူလက်ခံတတ်ကြတာများပါတယ်။
ဆိုလိုချင်တာက ဗုဒ္ဓဟာ ထိုင်းခြင်းလျှောင်းခြင်းစင်္ကြံလျှောက်ခြင်းရပ်ခြင်းဣရိယာပုထ်တွေကို ဘယ်အချိန်ဘယ်လောက်ကြာကြာအချိန်နာရီကန့်သတ်ပြီး တရားအားထုတ်ရမယ်လို့ သင်ပြထားတာမရှိပါဘူးကွယ်။
ဘုန်းဘုန်းရဲ့တရားစခန်းတွေမှာတော့ ပြည်တွင်းမှာရော ပြည်ပမှာပါ အနည်းဆုံးတစ်နာရီတော့ သမာဓိထူထောင်လို့ရအောင်ထိုင်ခိုင်းပါတယ်။ အလားတူပဲ စင်္ကြံလည်း သမာဓိထူထောင်လို့ရအောင် စိတ်မပျံ့ရလေအောင် တစ်နာရီလျှောက်ခိုင်းပါတယ်။ အစပထမတော့ “ထိသိ”ရိုးရိုးကိုလျှောက်ခိုင်းပါတယ်။ နောက်တော့ ယောဂီရဲ့သမာဓိရမှုအပေါ်မူတည်ပြီးတော့ “ထိသိပျက်”အထိစင်္ကြံလျှောက်ရင်းရှုကြရပါတယ်။
“ထိသိပျက်”အဆင့်မှာတော့ ဝိပဿနာနည်းဖြင့် စင်္ကြံလျှောက်တာဖြစ်ပါတယ်။ ယောဂီဟာပိုပြီးတည်ငြိမ်လာတဲ့သဘောကိုလည်းတွေ့ရပါတယ်။ အဲဒီလိုလက်တွေ့ကျကျ သိပ္ပံနည်းကျကျ သင်ပြပေးတဲ့အခါ ပြည်တွင်းမှာရောပြည်ပမှာပါ စိတ်ဝင်တစားအားထုတ်ကြတာကိုတွေ့ရပါတယ်။ အထူးသဖြင့်လူငယ်တွေပိုပြီးစိတ်ဝင်တစားအားထုတ်ကြတာကိုတွေ့ရပါတယ်။ လူကြီးတွေလည်းအားထုတ်ကြတာပါပဲ။
ဘယ်လောက်ကြာကြာထိုင်ပြီးအားထုတ်ရမယ်ဆိုတဲ့ မေးခွန်းနဲ့ပတ်သက်လို့ကတော့ ရဟန္တာများ အဓိဋ္ဌာန်ပြီး (၇)ရက် သမာပတ်ဝင်စားသလိုပေါ့ ယောဂီကိုယ်တိုင်က ထိုင်တဲ့ဣရိယာပုတ်နဲ့ကြာကြာထိုင်တာ အဆင်ပြေလာတယ် တိုးတက်လာတယ် လှုပ်ရှားပြုပြင်မှုသိပ်မတွေ့ရတော့ဘူးဆိုရင်တော့ ယောဂီရဲ့တွေ့ကြုံနေတဲ့ဓမ္မအလိုဓမ္မအဆင့်အတိုင်း ကြာကြာထိုင်ခွင့်ပြုပါတယ်။
ဒီနေရာမှာဘုန်းဘုန်းကကြာကြာထိုင်တာကို ကန့်ကွက်နေတာမဟုတ်ပါဘူး။ ဇွတ်အတင်း အနတ္တသဘောကို အတ္တအလိုအတိုင်း မလုပ်မိစေဖို့ကိုသာ သတိပေးတာပါ။ စအားထုတ်ခါစ တရားအားထုတ်မည့်ယောဂီကို ဘယ်နှစ်နာရီဘယ်လိုပုံစံဖြင့်ထိုင်ရမည်ဆိုတာမျိုးကို ပုံမသွင်းမိဖို့ အနတ္တကိုအတ္တမလုပ်မိစေဖို့သာ သင်ပြပေးတာပါ။
ယာဂီရောက်နေတဲ့ဓမ္မအဆင့်က ကြာကြာကိုထိုင်ဖို့အဆင်ပြေလာပြီဆိုရင်တော့ “ပလ္လင်္ဂံ အာဘုဇ္ဇိတွာ ဥုဇုံ ကာယံ ပဏိဓာယ”စတဲ့ ပါဠိတော်လာဗုဒ္ဓသင်ပြသောလမ်းစဉ်အတိုင်း ထိုင်လို့ရပါပြီ။ ဒါကလည်း စစ်စစ်ဆေးဆေးနဲ့လုပ်ရပါတယ်။ ယောဂီကို ဒီအတိုင်းသူလုပ်ချင်ရာလုပ်လွှတ်ထားလို့မရပါဘူး။ တရားကိစ္စမှာလုပ်ချင်ရာလုပ်ရင် စိတ်ကြောင်သွားတတ်ပါတယ်။ ဒါကြောင့်ဆရာသမားထံမှာ လမ်းညွှန်မှုခံယူဖို့လိုအပ်ပါတယ်။
ဘုန်းဘုန်းသင်ပေးနေတာကတော့ ၂၄/၇ ၂၄နာရီပတ်လုံး ဣရိယာပုထ်တိုင်းမှာသတိကပ်နိုင်အောင် ကြိုးစားဖို့သာအဓိကသင်ပြပေးပါတယ်။ ဒါကသိပ္ပံနည်းလည်းကျသလို ဓမ္မနဲ့လက်တွေ့ဘဝလည်းတစ်ထပ်တည်းကျပါတယ်။ ကြာကြာထိုင်တာ ကြာကြာစင်္ကြံလျှောက်တာတွေကတော့ ယောဂီတစ်ဦးခြင်းစီရဲ့အတွေ့အကြုံနဲ့ အားထုတ်နိုင်မှုအပေါ်သာမူတည်ပါတယ်ဆိုတာကို ပြောပါရစေကွယ်။
ဘုန်းဘုန်းကတော့ လူသားတွေနေ့စဉ်ဘဝထဲမှာ သူတို့နေထိုင်တဲ့ဣရိယာပုထ်တိုင်းမှာ သတိကပ်ပြီးနေတတ်ဖို့ကိုပိုပြီးသင်ပြပေးပါတယ်။ ကားသမားကကားမောင်းရင်သတိကပ်တတ်ဖို့ အိမ်သာတက်သူကအိမ်သာတက်ရင်းသတိကပ်တတ်ဖို့ ထမင်းဟင်းချက်သူက ထမင်းဟင်းချက်ရင်းသတိကပ်တတ်ဖို့ စသည်ပေါ့။ ကဲ– ဒီလောက်ဆိုရပြီထင်ပါတယ်နော်။
မေး။ ။မှန်ပါဘုရား။ စိတ်ရှည်လက်ရှည် အချိန်ပေးဖြေပေးတာကို ကျေးဇူးအများကြီးတင်ပါတယ်အရှင်ဘုရား။ တပည့်တော်တို့ကလည်း နေ့စဉ်ဘဝထဲမှာသတိကပ်နေထိုင်ရတာကို ၅ နာရီ ၆ နာရီ မျက်စိမှိတ်ပြီးထိုင်အားထုတ်ရတာထက်ပိုနှစ်သက်ပါတယ်အရှင်ဘုရား။
ဖြေ။ ။ကဲ–ဖြစ်သမျှပျက်သမျှ ဣရိယာပုထ်တိုင်းမှာ သတိကပ်ပြီး ဘဝနဲ့ဓမ္မတစ်ထပ်တည်းကျအောင်နေထိုင်တတ်ပါစေ။