ကျောင်းဟောင်းပြုပြင်မှုနှင့် အရှင်မဟာကဿစရှိသော အရိယာအရှင်မြတ်ကြီးများဆက်စပ်နေပုံ (နေ့ပရိယတ် ညပဋိပတ်ဖြင့် သာသနာတော်၌ ပျော်ရွှင်ကြည်နူးစွာ နေထိုင်၍ သာသနာပြုတော်မူကြပုံ)
ဒီမနက်သန့်ရှင်းရေးလုပ်ကြ၏။ ဘုန်းကြီးကိုယ်တိုင်လည်း တတ်နိုင်သလောက်လုပ်ရ၏။ အများဆုံးကတော့ လုပ်နေကျတပည့်လိမ္မာများက ဝိုင်းလုပ်ကြ၏။ ဘုန်းကြီး၏ အခက်အခဲမှာ ဆူညံမှုကိုလုံးဝမကြိုက်ပေ။ ထိုကြောင့် စည်းရကမ်းတကျရှိမှု ယဉ်ကျေးလိမ္မာမှု နူးညံ့သောစိတ်နှလုံးသားရှိမှု စသည့်ဂုဏ်အဂါၤများနှင့် အထိုက်အလျှောက်ပြည့်စုံသော တပည့်လိမ္မာများကိုသာ အနီးကပ်လေ့ကျင့်ပေး၍ အလုပ်ကိုစနစ်တကျလုပ်စေ၏။ ထိုစည်းကမ်းဇယားများကို သူတို့တွေ၏ဘဝထဲအထိ ပါသွာစေလိုပေ၏။ ထို့ကြောင့်လူအလွန်ရွေးရပေ၏။
ဘုန်းကြီးကိုယ်တိုင်လည်း တတ်နိုင်သမျှလုပ်၏။ ဘုန်းကြီးမွေးခဲ့သော တပည့်ကြီးငယ်များသည်လည်း သူ့ကဏ္ဍအလိုက် လိမ္မာကျွမ်းကျင်မှုရှိကြသောကြောင့် တခါတခါအလွန်ဝမ်းသာပီတိ ဖြစ်မိပေ၏။ အများစုခက်ခဲလေးလံသော အလုပ်များကို သူတို့ကိုယ်တိုင်လုပ်ကြသော်လည်း ဘုန်းကြီးကိုယ်တိုင်လည်း အရညဝါသီတောရဘုန်းတော်ကြီးပီပီ တတ်နိုင်သည်များကို လုပ်ရပေ၏။ ယခုလည်းညနေ ၄:၀၀ နာရီခန့်မှ ၆:၄၅ နာရီခန့်အထိ အဆင်မပြေသော တခါးပေါက်အပိတ်ဟောင်းများကို တတ်နိုင်သလောက် ပြုပြင်ကြည့်၏။ လွယ်တော့လည်းလွယ်လှသည်မဟုတ်ပေ။
ထိုအချိန်၌ ဓုတင်(၁၃)ပါးအရာဝယ် အမြတ်ဆုံးဘွဲ့ထူးကို ဆွတ်ခူးနိုင်ခဲ့သောကျေဇူးတော်ရှင် အရိယာအရှင်မြတ်ကြီး အရှင်မဟာကဿပအား အထူးအာရုံရောက်၍ အားတင်းပြုလုပ်ရ၏။ ထိုအရှင်မြတ်ကြီးနှင့်အတူ ရဟန္တာအရှင်မြတ်ကြီးများသည် ပထမဦးဆုံးအကြိမ် သင်္ဂါယနာတင်ပွဲကြီးကျင်းပမည့်ပွဲမတိုင်မီ မိမိတို့၏သက်ဆိုင်ရာကျာင်းဆောင်များကို ကိုယ်တိုင်ပြုပြင်မွန်းမံတည်ဆောက်ကြကြောင်း ဝိနည်းပိဋကမဟာဝဂ္ဂပါဠိတော်၌ လာရှိသည်ကို စာသင်သားဘဝက လေ့လာသင်ယူကြည်ညိုခဲ့ဘူးပေ၏။ အလွန်ကြည်ညိုမိခဲ့ဘူး၏။
ယခုလည်းမိမိသည် သက်တော် (၅၁)နှစ်အရွယ်တော်သို့ ရောက်သည့်တိုင်အောင် ဧကစာရီတစ်ပါးတည်းတောရမှီလျှက် ထေရဝါဒဝိပဿနာသာသနာတော် အရှည်တည်တန့်ခိုင်ခံ့နိုင်ရေးအတွက် မိမိလည်းအားထုတ် စိတ်ဝင်စားသူများကိုလည်း တရားစခန်းဖွင့်လှစ်သင်ပြပေးနေသော အရညဝါသီတောရဆရာတော်တစ်ပါးဖြစ်၍ ထိုကဲ့သို့အဟောင်းများကို တတ်နိုင်သလောက် ပြုပြင်မွန်းတတ်ရန် အားထုတ်ရသောအခါများလည်းရှိပေ၏။ သို့သော်လည်းအများစုကိုကား မိမိကိုယ်တိုင်ဓမ္မဖြင့်မွေးမြူအပ်သော မိမိ၏ဓမ္မသားသမီးတပည့်ကြီးငယ်တို့က ဝိုင်းဝန်းတာဝန်ယူလုပ်ဆောင်ကြ၏။
မိသားစုစိတ်ဓာတ်ဖြစ်၍ မိမိကိုယ်တိုင်လည်း လုပ်ရသည်ဖြစ်ပေ၏။ တောရဆောက်တည်မည့်အရှင်ကောင်းများအနေဖြင့် ထိုသို့မိမိကိုယ်တိုင် မိမိ၏ကိစ္စအတော်များများကို ဆောင်ရွက်ထမ်းပိုးနိုင်မှသာ တောရဆောက်တည်ကြပါ “အရညဝါသီဘွဲ့” ကို ခံယူတော်မူကြပါဟု အလေးအနက်တိုက်တွန်းလိုက်ရပေ၏။ လူဝတ်ကြောင်ဒါယကာဒါယိကာမများ၏ အပူဇော်ခံရယုံမျှ ဘုန်းကြီးရုံလာဘ်ပေါရုံမျှကိုသာ ဆန္ဒရှိသော ပြော့ညံ့သော စိတ်ဓာတ်ဖြင့်တောရမဆောက်တည်ကြပါနှင့်ဟု မေတ္တာကြီးစွာဖြင့် အကြံပြုလိုက်ရပေ၏။ သို့မဟုတ်က ဘာကောင်းကျိုးမျှဖြစ်မည်မဟုတ်ပေ။
(မှတ်ချက်။ ။မည်သည့်ဘာသာတရားကိုမျှ ရန်မူရန်သင်ပြတော်မမူခဲ့ပေ။ ငြိမ်းချမ်းစွာ အတူယှဉ်တွဲနေထိုင်နည်းကိုသာ သင်ပြတော်မူခဲ့ပေ၏။ လူကြီးလူကောင်း ပညာရှိသူတော်ကောင်းတို့၏ လမ်းစဉ်အစစ်ကြီးသာ ဖြစ်ပေ၏။)
