Category: Dhamma Myanmar

ဘုန်းဘုန်းချစ်သောရွှေဂိုက်များသို့ မေတ္တာကြီးကြီးဖြင့်

မဟာဂန္ဓာရုံဆရာတော်ကြီး၏ဆန္ဒတော်နှင့် ယခုလက်ရှိလုပ်ဆောင်နေပုံတစ်စိတ်တစ်ဒေသကို ယှဉ်တွဲသိရှိနားလည်နိုင်ရန်နှင့် အကောင်းဆုံးဖြစ်အောင်ပူးပေါင်းဆောင်ရွက်ပေးနိုင်ကြရန်

မိမိအနေဖြင့်ကား tourism နှင့်မဟာဂန္ဓာရုံ အခြေအနေတွင် ရပ်တည်ချက်မပြောင်းပါ။ ဒီလောက်ပရိယတ်ပဋိပတ်ဂုဏ်သိက္ခာဖြင့် နေလိုလလို နှစ်ပေါင်းများစွာရပ်တည်လာသော မဟာဂန္ဓာရုံကျောင်းတိုက်ကြီးကို tourist attraction အဖြစ်မျှ မလုပ်စေချင်ပါ။ မိမိသည်သာ ဆရာတော်ကြီးများ၏နေရာဖြစ်ခဲ့သော် “No Tourist”ဟူသော signpost ကို ချက်ချင်းကောက်ချိတ်မိမည်မှာ အလွန်သေချာလှပေ၏။ အဘယ်ကြောင့်ဆိုသော် ကျေးဇူးရှင်ဆရာတော်ဘုရားကြီးအရှင်ဇနကာဘိဝံသ၏ ဆန္ဒတော်ကိုမိမိရောက်လေရာတွင် အကောင်အထည်ဖေါ်ဆောင် ကျင့်သုံးနေခြင်းကြောင့်တည်း။

မိမိ၏တောရကျောင်းတိုက်တွင် ✖️ပြည်တွင်းပြည်ပမှဘုရားဖူးလျှောက်လည်တိုးရစ်သက်သက်ကို✖️လုံးဝဥဿုံလက်မခံပါ။ သို့သော်တရားအားထုတ်လိုလျှင်ကား ပြည်တွင်းပြည်ပမခွဲခြားဘဲ အားလုံးကိုလက်ခံပေ၏။ မိမိ၏တောရသို့လာလိုသော နိုင်ငံခြားသားတိုင်းကိုလည်း စကားစမည်ပြောရုံသက်သက်ဆို လုံးဝမလာဖို့ ပြဿားစွာပြောရပေ၏။ အမှန်တကယ်တရားအားထုတ်လိုက (၇) ရက်တိတိနေထိုင်ခွင့်ပေးပြီးသင်ပြပေး၏။ အားထုတ်စေ၏။ ဒီလိုမဟုတ်ရင်ဗရုပ်သုက္ခ တိုးရစ်မှန်သမျှအကုန်ရောက်လာက မိမိအတွက်တရားအားထုတ်ရန် များစွာအနှောက်အယှက်ဖြစ်နိုင်ပေ၏။

မဟာဂန္ဓာရုံကျောင်းတိုက်ကြီးကို စတင်ထူထောင်တော်မူခဲ့သော ကျေးဇူးရှင်ဆရာတော်ဘုရားကြီးအရှင်ဇနကာဘိဝံသသည် တိတ်ဆိတ်ငြိမ်သက်ပြီး တရားမဲ့သောပရိသတ်နှင့် တရားမဲ့သောလာဘ်လာဘကင်းသည့် ဝိဝေကကိုလိုလားနှစ်သက်တော်မူ၏။ စာပေသင်ယူရာ၌ပင် စာကိုအသံထွက်၍ပြန်ဆိုခြင်းမပြုရဘဲ တိုးတိုးတိတ်တိတ်ပြန်ဆိုရပေ၏။ ဤသည်ကို ယခုလက်ရှိ သက်တော် ၆၀ ကျော် ၇၀ ပတ်ဝန်းကျင်ဆရာတော်များ အားလုံးသိပြီးဖြစ်ကြပေ၏။ ထိုဆရာတော်များ၏ ဆုံးမသင်ပြသြဝါဒဖြင့်မိမိကိုယ်တိုင်ပင် စာကိုတိတ်တိတ်ဆိတ်ဆိတ်ကျက်မှတ်ရန် ကြိုးစားခဲ့သလို မိမိသင်ပြပေးရ၍ မိမိထံစာပြန်ကြသော တပည့်များကိုလည်း တိုးတိုးစာပြန်ကြရန် တိုက်တွန်းလုပ်ကိုင်ခဲ့ဘူးပေ၏။

ဤကဲ့သို့တိတ်ဆိတ်ခြင်းငြိမ်သက်ခြင်း တရားမရှိသောပရိတ်သတ် တရားမပါသောလာဘ်လာဘများမှကင်းဆိတ်မှု(ဝိဝေက)ကိုနှစ်သက်၍ ဧကစာရီတောရဆောက်တည်ကျင့်သုံးနေသည်မှာ ၁၆ နှစ်ပင်ရှိခဲ့ပေပြီ။ မိမိတောရဆောက်တည်ကျင့်သုံးခြင်းသည်လည်း ကျေးဇူးရှင်ဆရာတော်ဘုရားကြီးအရှင်ဇနကာဘိဝံသ၏ ဆန္ဒတော်အတိုင်းအားထုတ်နေခြင်းတည်း။ ဆရာတော်ဘုရားကြီးသည် တောရဆောက်တည်ကျင့်သုံးကာ ဓမ္မဝိနယစစ်စစ်ဖြင့် နေထိုင်လိုသောဆန္ဒအလွန်ပြင်းပြတော်မူခဲ့ပေ၏။

သို့သော်ပရိယတ္တိစာပေကိုလည်း သံယောဇန်ကြီးကာ နောင်လာနောက်သားများ စာပေသင်ယူလေ့လာရေးတွင်လွယ်ကူစေရန်အကျိုးငှာ ဘာသာဋီကာကျမ်းများစွာကိုရေးသားလျှက် သာသနာပြုလိုစိတ်ပြင်းပြ၍ တောထွက်တောရဆောက်တည်ရန် အခွင့်မသာဖြစ်ခဲ့ရပေ၏။ ဆရာတော်ဘုရားကြီး၏ ဘာသာဋီကာတို့သည်လည်း အမှန်တကယ်ပင်ထိရောက် အကျိုးရှိလှပေ၏။ မိမိတို့တောရဆောက်တည် အားထုတ်ကြသော မဟာဂန္ဓာရုံမျိုးဆက်များအတွက် အထူးကိုအကျိုးများပေ၏။ အကြိမ်ကြိမ်ကြည့်ရှုရ၍စာအုပ်များပင် စုပ်ပြတ်နေလေပြီ။

🌲🌲🌲🧘‍♂️🧘‍♂️🧘‍♂️ဤကဲ့သို့ကျမ်းပြုစာချဆရာတော်ကြီးဘဝနှင့်ပင် မဟာဂန္ဓာရုံကျောင်းတိုက်ကြီးကို တောရကျောင်းသဘွယ်တိတ်ဆိတ်ငြိမ်သက်အောင် ဖန်တီးတော်မူခဲ့ပေ၏။ ဝိနည်းတော်နှင့်အညီနေထိုင်၍ရအောင် စနစ်တကျဖန်တီးတော်မူထားခဲ့၏။ ဆရာတော်ဘုရားကြီးက စိတ်ကောင်းရှိသူသည် ဝိနည်းလေးစားဖို့ သဒ္ဓါတရားကောင်းကောင်းဖြင့် ပရိယတ္တိစာပေသင်ယူဖို့ တရားဘာဝနာအားထုတ်ဖို့လည်း အဖြစ်နိုင်ဆုံးဟုယုံကြည်တော်မူခဲ့ပေ၏။ ထို့ကြောင့်ပင်မဟာဂန္ဓာရုံကျောင်းတိုင်ကြီးတွင်နေထိုင်လိုသော ရဟန်းသံဃာမှန်သမျှသည် “စိတ်ကောင်းရှိဖို့က ပထမ၊ ဝိနည်းလေးစားဖို့က ဒုတိယ—“စသည့်စည်းကမ်းချက် ၁၀ ချက်ကို အစဉ်အတိုင်းလိုက်နာရမည်ဟု ချမှတ်ကျင့်သုံးစေတော်မူခဲ့ပေ၏။🌲🌲🌲🧘‍♂️🧘‍♂️🧘‍♂️

မိမိသည်တောရဆောက်တည်ကျင့်သုံးကာ ဤအချက်တို့ကိုဆက်လက်လိုက်နာ၍ ဆရာတော်ဘုရားကြီး၏ဆန္ဒတော်အတိုင်း နိုင်ငံတကာနှင့်ရင်ဘောင်တန်းလျက် သာသနာ့တာဝန်ထမ်းဆောင်နိုင်သော professional Theravāda Buddhist monk တစ်ပါးဖြစ်လာရန် ရိုးသားစွာအားထုတ်နေခြင်းမျှသာတည်း။ ထို့ကြောင့်အများမှားနေသောအမှားတို့ကိုထပ်မံ၍ မမှားလိုပေ။ ဤအကြောင်းကြောင့်ပင်မိမိ၏တောရဌာနတွင် အမှန်တကယ်သဒ္ဓါထက်သန်ပြီး မိမိအတွက်သူတပါးအတွက်သာသနာပြုလိုစိတ်အမှန်တကယ်ရှိသော သူတော်ကောင်းများကိုသာ ၁ မှ စ၍မွေးမြူမည်ဟု ဆုံးဖြတ်ထားပေ၏။

ယခုမိမိတို့ကျောင်းတိုက်ကြီးအတွက်လည်း မိမိဆန္ဒအတိုင်းဆိုလျှင် “No Tourist” to Mahagandhayon ဟူသော signpost ကိုချိတ်လျှက် တိုးရစ်သက်သက်ဝင်ရောက်ခွင့်ကို ပိတ်ပါမည်။ ပဓာနသာသနာ့တာဝန်ဖြစ်သော ပရိယတ်ပဋိပတ်တာဝန်ကိုသာ ပြည်တွင်းပြည်ပမှရောက်လာကြသော ရဟန်းသံဃာသူတော်ကောင်း လူသူတော်ကောင်းများအား လေ့လာသင်ယူကျင့်သုံးစေလျှက် နိဗ္ဗာန်နှင့်ဆီလျှော်အောင်ကျင့်သုံးနေထိုင်စေပါမည်။ နေထိုင်သွားပါမည်။ ဤအချက်ကို tourism တွင်လုပ်ကိုင်နေကြသော ထေရဝါဒီသူတော်ကောင်း အမျိုးကောင်းသားအမျိုးကောင်းသမီးများလည်း အထူးနှလုံးသွင်းစေလိုပါသည်။

ယခုသော် မိမိသည် Tourist များနှင့်ပတ်သက်၍ လက်ရှိဆရာတော်ကြီး အဘိဓဇမဟာရဋ္ဌဂုရုဘဒ္ဒန္တဣန္ဒောဘာသာဘိဝံသဆရာတော်ကြီးနှင့် ဘဒ္ဒန္တမဟိန္ဒ (အဂ္ဂမဟာပဏ္ဍိတ)ဆရာတော်ကြီးများအပါအဝင် ဆရာတော်အများစု၏ နှစ်ပေါင်းများစွာပွားများလာကြသော မေတ္တာနှလုံးသားသည်တားမြစ်ပိတ်ပင်ရန် မဖြစ်နိုင်လောက်အောင်နူးညံ့နေကြဆဲဖြစ်၍သာ နိုင်ငံခြားသားအများအပေါ် ပိတ်ပင်ရန်ဆန္ဒမရှိသေးသဖြင့်အားလုံးစိတ်ချမ်းသာမှုရှိစေရန် အလျှော်အတိုင်းဖြစ်သင့်သလောက်ဖြစ်ရန် လုပ်ဆောင်ပေးနေခြင်းမျှသာတည်း။ မိဆန္ဒအရဆိုလျှင် မနေ့ကတရုတ်တို့ရန်ဖြစ်သတ်ပုတ်ကြသည်အထိ အခြေအနေကို ကျောင်းတိုက်အပေါ်ဂါရဝကင်းမဲ့လာသည်ဟု ခံစားရပေ၏။ ထို့ကြောင့် ယခု မန္တလေး tourism မှ ဥက္ကဋ္ဌ ဒုဥက္ကဋ္ဌ ညွှန်မှူး ဒုညွှန်မှူးများဖြင့် တွေ့ဆုံညှိုနှိုင်းလုပ်ဆောင်ကာ plan သုံးခုချမှတ်ထားပါပြီ။

ယခု plan A အရ ဆရာတော်ကြီးများဆန္ဒရှိသလို ပိတ်လည်းမပိတ်သေးဘဲ ကျောင်းတိုက်ကိုလည်း မလိုအပ်သည်များဖြင့်မရှုပ်ထွေးစေရအောင် စောင့်ကြည့်ကာလတွင် ဆောင်ရွက်စရာများကို စတင်ဆောင်ရွက်နေကြပေပြီ။ မိမိအနေဖြင့်ကား ကျောင်းတိုက်ကြီးရဲ့ဂုဏ်သိက္ခာကို ပစ်စလက်ခတ်ထိခိုက်မှုကို လုံးဝလက်ခံမည်မဟုတ်ပါ။ မိမိကြည်ညိုလေးစားတန်ဖိုးထားရသော ကျေးဇူးရှင်ဆရာတော်ဘုရားကြီး အရှင်ဇနကာဘိဝံသ မွန်မြတ်စွာလေးနက်စွာ တည်ထောင်ခဲ့သော ကျောင်းတိုက်ကြီးဖြစ်နေသောကြောင့်တည်း။ ထို့ကြောင့် ဆရာတော်အများစု၏မေတ္တာဆန္ဒနှင့်လည်းလျှော်ညီအောင် ကျောင်းတိုက်အတွက်လည်း အနှောက်အယှက်မဖြစ်စေရအောင် tourism မှတာဝန်ရှိသူများကို ဆရာတော်နှင့်တွေ့ဆုံပေးကာ လျှောက်ထားညှိုနှိုင်းစေခဲ့၏။

plan B အရ ဆိုလျှင် အကယ်၍သံဃာတော်များအား ဆွမ်းစားချိန်အနှောက်အယှက်အရမ်းဖြစ်လာသော် ဆရာတော်များလည်း စိတ်အနှောက်အယှက်ဖြစ်သည်ဟု ခံစားချက်ဖြစ်ပေါ်လာသည်ရှိသော် tourist များအားဆွမ်းစားကျောင်းအထိလာကြည့်ရန်ပိတ်ပါမည်။ ဒီဘက်ကဆွမ်းခံပုံစံကို ယခုကျောင်းတိုက်၏ မြောက်ဘက်က ကားကြီးများရပ်ရာ ကွင်းပြင်ထဲတွင် LED board ထောင်၍ အဲဒီမှာသာ တိုက်ရိုက် live လွှင့်ထုတ်ပြသပေးပြီး အဲဒီမှာသာ LED board ၌ ကြည့်ချင်သလောက်ကြည့်လျှက် ပြန်ကြရန် စီစဉ်ထားပါကြောင်း။

Plan C အရဆိုလျှင် မထိမ်းနိုင်တော့၍ completely disturbed and annoyed ဖြစ်လာသောအခါ tourist လည်ပတ်ခွင့်ကို လုံးဝအပြီးပိတ်လိုက်တော့မည်ဟု စီစဉ်နေပါကြောင်း ဟော်တယ်ခရီးသွားနှင့် senior junior guides များအား အသိပေးလိုက်ပါရစေ။ ဤကားပြောင်းလဲလာသော ခေတ်ကာလအခြေအနေနှင့် လက်ရှိမဟာဂန္ဓာရုံဆရာတော်ကြီးများနှင့်အတူ ဆရာတော်အများစု၏ မေတ္တာဆန္ဒကိုစနစ်တကျဖြည့်ဆည်းပေးရန် မန္တလေးဟော်တယ်ခရီးသွားအသင်းရယ် ဂိုက်အသင်းရယ် မိမိရယ် အကောင်းဆုံးဖြစ်အောင် ညှိုနှိုင်းစီစဉ်ဖန်တီးကြခြင်းမျှသာတည်း။ အားလုံးပူးပေါင်းဆောင်ရွက်ကာ အကောင်းဆုံးဖြစ်အောင်ဝိုင်းဝန်းဆောင်ရွက်ပေးကြရန်လည်း မေတ္တာရပ်ခံပါရစေ။ ဘုန်းဘုန်းရဲ့ဆန္ဒအတိုင်းဆိုလျှင် တိုးရစ်သက်သက်ကို ပိတ်ပစ်ဖို့သာဆန္ဒရှိပါကြောင်း။

အားလုံးသတ္တဝါ ဘေးရန်ကွာ ချမ်းသာကိုယ်စိတ်မြဲပါစေ။
သတ္တဝါမှန်သရွေ့ တရားတွေ့ ချမ်းမြေ့သာယာရှိပါစေ။
ဗုဒ္ဓမြတ်စွာ သာသနာ ကမ္ဘာအနှံ့ရောက်ပါစေ။
သူငါများစွာ တန်ဖိုးရှာ လူ့ရွာနေကျိုးနပ်ပါစေ။

ရဟန်းဘဝအရသာနှင့်ရဟန်းတို့လုပ်ရမည့်အလုပ်
(မွေးနေ့တွင်အလုပ်ရှုပ်မည်ဖြစ်၍ ကြိုတင်ရေးသားဝေမျှခြင်းတည်း)။

အေးချမ်းသောဓာတ်သဘာဝကိုခံစားချင်၍ ရဟန်းအဖြစ်ကိုခံယူခဲ့၏။ ထို့ကြောင့် ရဟန်းဖြစ်စထိုခဏကတည်းပင် လောကီကိစ္စအဝဝကိုစွန့် ရွှေငွေအလှူမခံ ကိုယ်ခြေသလုံးမြင်းခေါင်းကိုယ်အားကိုး သမ္မာအာဇီဝကျကျ သဒ္ဓါတရားထက်သန်သော ဒကာဒကာမများထံမှ ကိုယ့်ဆွမ်းကိုယ်ခံစားရင်း ပရိယတ်ပဋိပတ် သာသနာ့တာဝန်ကို ဖြူစင်မှန်ကန်စွာ ထမ်းဆောင်လာခဲ့သည်မှာ နှစ်ပေါင်း ၃၀ နီးပါးရှိလာခဲ့ပေပြီ။

မိမိသည် တက္ကသိုလ်ကျောင်းပြီးမှ တရားစခန်းဝင်ကာ (၆)လခန့် မဟာစည်နည်းအတိုင်း လူဘဝဖြင့် စိတ်ဝင်တစားအားထုတ်ခဲ့ပြီးမှ ရဟန်းဘောင်တက်ချင်စိတ်ဖြစ်လာသောကြောင့် ရဟန်းအဖြစ်ခံယူခဲ့ခြင်းဖြစ်၍ ရဟန်းသိက္ခာတော်နှင့် သက်တော်မှာ (၄) နှစ်ခန့်ကွာခြားနေခြင်းဖြစ်ပေ၏။ အမှန်ဆိုရသော် မိမိ၌ရဟန်းအဖြစ်ခံယူမည်ဟူသော စိတ်ကူးအိပ်မက်ဘယ်တုံးကမျှမရှိခဲ့ဘူးပေ။ (၆)လကြာသတိပဋ္ဌာန်ဝိပဿနာအားထုတ်မှုသည် မိမိဘဝအတွက်ကြီးစွာသောအပြောင်းအလဲကို ဖြစ်စေခဲ့ပေ၏။ မိမိရဟန်းခံပြီးနောက် ပရိယတ္တိစာပေကိုသင်ယူမှဖြစ်မည်ဟု အခိုင်အမာဖြစ်ပေါ်လာကာ မိမိ၏ဥပစ္ဈာယ်ဆရာတော်အား ပူဆာရာမှ မဟာဂန္ဓာရုံကျောင်းတိုက်သို့ရောက်လာခဲ့ပေ၏။

ထိုစဉ်က ဆရာတော်ကြီးအရှင်ဆန္ဒောဘာသက “ဒီကိုယ်တော်ကြီး ကြီးပြီလက်ခံလို့မဖြစ်ဘူး”ဟု ငြင်းပယ်တော်မူ၏။ ထိုစဉ်က ဥူးပဉ္ဇင်းဆိုလျှင်လက်မခံ ကိုရင်ကြီးလျှင်ပင်လက်မခံသေးသောခေတ်ဖြစ်ပေ၏။ ကိုရင်ငယ်ဘဝဖြင့်လာရောက်အပ်နှံသော ကလေးများကိုကား ဖိုးသူတော်အသွင်သို့ ပြောင်းပေးလေ့ရှိ၏။ အသက်ကြီးလျှင်အဆုံးမခက်သောကြောင်းတည်း။ the younger the better ဟူသောဆိုးရိုးအတိုင်းသာဖြစ်ပေ၏။

သို့သော် ဆရာတော်ဥူးကုဏ္ဍလာဘိဝံသ ဆရာတော်ဥူးဣန္ဒောဘာသာဘိဝံသ ဆရာတော်ဥူးမဟိန္ဒတို့သည်ကား အရွယ်မတိမ်းမယိမ်းစိတ်တူကိုယ်တူရှိတော်မူကြည်ပေ၏။ သူတို့သုံးပါးအား မိမိမဟာဂန္ဓာရုံသို့လာရောက်အပ်နှံစဉ်က တောင်ကျောင်းကြီးအပေါ်ထပ်တွင် အတူတကွတွေ့မြင်ခဲ့ရပေ၏။ အားလုံးက ၅၀ ပတ်ဝန်းကျင်အရွယ်များတည်း။ ဆရာတော်ကြီးဥူးကုဏ္ဍလက “ဆရာတော်လက်မခံလည်း ကိုယ်တော်ပညာတတ်ပဲ တပည့်တော်တို့လက်ခံမှာပါ”ဟု ပြောဆိုလက်ခံကာ တိုက်သစ်ကျောင်းဘုန်းကြီး နယ်လှည့်ဓမ္မကထိက ဥူးဉာဏဝံသထံသို့အပ်လိုက်ပေ၏။ ဤကားလွန်ခဲ့သော နှစ်ပေါင်းသုံးဆယ်ခန့်က မဟာဂန္ဓာရုံ၌ မိမိဘဝအစတည်း။

ထိုအချိန်မှစ၍ ယခုအချိန်အထိ မဟာဂန္ဓာရုံဆရာတော်ကြီးနှင့် ဆရာတော်အဆက်ဆက်၏ အဆုံးအမသြဝါဒများအတိုင်း ပရိယတ်ပဋိပတ်တွဲကာ စနစ်တကျနေထိုင်ကျင့်သုံးခဲ့ပေ၏။ မိမိသည်မဟာဂန္ဓာရုံအသွေးအသားအစစ်ဖြစ်ပေ၏။ မည်သည့်ကျောင်းတိုက်နှင့်မျှအရောအနှောမရှိခဲ့ပေ။ ဤသို့ဖြစ်အောင်လည်း မိမိလေးစားကြည်ညိုသော ဆရာတော်ဘုရားကြီး၏ အဆုံးအမအတိုင်း ပရိယတ်ပဋိပတ်တွဲကာ စနစ်တကျနေထိုင်၏။ ထိုသို့နေထိုင်တတ်အောင် မိမိအားသင်ပြပေးခဲ့ကြသော ဆရာသမားများကိုလည်း ကျေးဇူးတင်၍မဆုံးပင်ဖြစ်ရပေ၏။

လာမည့်ဖေဖေါ်ဝါရီလ ၁၂ ရက်နေ့ ဆိုလျှင် မိမိ၏ ၅၄ နှစ်မြောက်မွေးနေ့သို့ပင်ရောက်လာခဲ့ပေပြီ။ အရွယ်သည် ဇရာအဆင့်သို့တဆင့်တဆင့်တက်လှမ်းလာနေသော်လည်း ကျန်းမာနေဆဲဖြစ်၍ ကျေနပ်ပီတိဖြစ်ရပေသေး၏။ ပြည်တွင်း၌သာမက ပြည်ပအထိပင် လူသားများကောင်းကျိုးချမ်းသာဖြစ်ရေးကို ဗုဒ္ဓဓမ္မနှင့်အညီ စွမ်းဆောင်ပေးနိုင်နေပြီဖြစ်၍ ပို၍ကျန်းမာအောင် အထူးသဖြင့်တစ်ထပ်သောဆွမ်စား မတည့်သောအစာများရှောင်ကျဉ်ကာ နေထိုင်လျှက် တရားထိုင်ခြင်းအလေ့အထဖြင့်ရှင်သန်ကာ လူသားအားလုံးအတွက် ထိုထက်ပို၍ အလုပ်လုပ်ချင်စိတ်ဖြစ်နေဆဲတည်း။

ထိုနှစ်ပေါင်း ၃၀ လောက် အတွင်းတွင် —-

(၁)။ မိမိကိုယ်မိမိပရိယတ်ပဋိပတ်ကို ဖြူစင်စွာကျင့်ကြံအားထုတ်နိုင်ခြင်း။ မိမိတို့မိခင်မဟာဂန္ဓာရုံကျောင်းတိုက်ကြီး၌ ပရိယတ်ပဋိပတ်သာသနာ့တာဝန်ထမ်းဆောင်နေကြသော သံဃာတော်တစ်ထောင်ကျော်အား နှစ်စဉ်ရာသက်ပန်ဆွမ်းကပ်ရက်ယူလျှက် မိမိ၏မွေးနေ့ရောက်တိုင်း ဆွမ်းကပ်နိုင်ခဲ့သည်မှာလည်း ၁၆ နှစ်ကျော်ပင်ရှိလာခြင်း။

(၂)။ ထိုသို့အားထုတ်နေချိန်မှာပင် မိမိသည်တပည့်မွေးမြူခြင်းမဟုတ်သည့်တိုင်အောင် ပြည်တွင်းပြည်ပ၌ လက်ထောက်ပြနိုင်လောက်အောင်ရဟန်းတပည့်လူတပည့်များ Dr ဘွဲ့ PhD များဖြင့်သက်ဆိုင်ရာတာဝန်များကိုထမ်းဆောင်နေနိုင်ကြလောက်အောင် မွေးထုတ်ထားနိုင်ခဲ့ခြင်း။ ဤမဟာဂန္ဓာရုံကျောင်းတိုက်၌ပင် မိမိထံစာပေလေ့လာသင်ယူကြရင်း အလုပ်ဖြစ်လောက်အောင် တတ်ကျွမ်းလာသောတပည့်များထွက်ပေါ်လာခြင်း။

(၃)။ ထိုနှစ်ပေါင်း ၃၀ အတွင်းတွင် ကျေးဇူးရှင်ဆရာတော်ဘုရားကြီး အရှင်ဇနကာဘိဝံသ၏ဆန္ဒတော်ကိုဖြည့်ဆည်းလိုစိတ်ပြင်းပြလျှက် “သစ္စာမြိုင်တောရ”ဟူသောအမည်ဖြင့် ၁၆ နှစ် ၁၆ ဝါတိတိ ဧကစာရီတောရမှီလျှက်ဝါဆိုကျင့်သုံးနိုင်ခဲ့ခြင်း။ ထိုသို့တောရဆောက်တည်ကျင့်သုံးနေစဉ်မှာပင် တပည့်ဒကာများအား “နှစ်ကူးလျှင်တရားနှင့်ကူးကြ သီးတင်းကျွတ်လျှင်တရားနှင့်ကျွတ်ကြ”ဟုဝါဒပေးကာ မြန်မာ့နှစ်သစ်ကူးတစ်ကြိမ် သီတင်းကျွတ်တစ်ကြိမ် သတိပဋ္ဌာန်အခြေခံသော ဝိပဿနာတရားအားထုတ်နည်းကို နိုင်ငံတကာပုံစံအဆင့်မီ ထေရဝါဒနှင့်အညီသိပ္ပံနည်းကျအားထုတ်တတ်အောင် သင်ပြပေးနိုင်ခြင်း။

(၄)။ ၂၀၁၄ မှစ၍ ဥရောပဒေသ စပိန်အီတလီ (တစ်လခွဲခန့် ) ၂၀၁၆ တရုတ်ပြည်ပီကင်းမြို့တော် (နှစ်ပတ်ခန့်) ၂၀၁၇ ကမ္ဗောဒီးယား ဖနောင်ပင် အန်ကော (တစ်လကျော်ခန့်) ၂၀၁၈ နှစ်ကုန်ပိုင်းတွင် စင်္ကာပူ (နှစ်ပတ်ခန့်) စသောပြည်ပတိုင်းပြည်များအထိ သတိပဋ္ဌာန်အခြေခံသောဝိပဿနာအကျင့်ကို သိပ္ပံနည်းကျ ခေတ်မီစွာသင်ပြပေးနိုင်ခဲ့ခြင်း။ တက်ရောက်လေ့လာသင်ယူအားထုတ်ခဲ့ကြသော ဒေခံပြည်သူများမှာလည်း ကျေနပ်အားရမှုရှိကြခြင်း။

(၅)။ အောက်ပါတရားစာအုပ်များကိုလည်း နိုင်ငံတကာမှဗုဒ္ဓဘာသာလေ့လာလိုသူတို့၏ တိုက်တွန်းတောင်းဆိုမှုဖြင့် ဗုဒ္ဓဓမ္မကိုနိုင်ငံတကာအဆင့်မီ အင်္ဂလိပ်ဘာသာဖြင့်ရေးသားထုတ်ဝေနိုင်ခဲ့ခြင်း။
(1). How meditation can help
(2). Buddhist Thoughts in world situations
(3). Social guides of Buddhism
(4). Buddhist philosophy on married life
(5). Buddhism and democracy
(6). They and I my Dhamma trip to Europe
(7). Buddhism as a remedy
(8). Human being, judgment and Vipassanā
(9). Science encountered mindfulness of Buddhism

(၁၀)။ လွယ်ကူသက်သာ English Grammar
(၁၁)။ ချမ်းသာစွာနေထိုင်နည်း
(၁၂)။ နေ့စဉ်ဘဝနှင့်ယောဂီအဓိပ္ပါယ်
(၁၃)။ ဝိပဿနာလက်ဆောင်
(၁၄)။ ရှေးရိုးကျင့်စဉ်နှင့်ခေတ်သစ်အတွေးအခေါ်

စသောမြန်မာစာအုပ်များကိုလည်း ရေးသားထုတ်ဝေနိုင်ခဲ့ခြင်း။ စသည်တို့ကိုပြန်လည်သုံးသပ်ကြည့်မိသည်ရှိသော် မိမိသည်ရဟန်းဝါ (၃၀) လောက်အတွင်း သက်တော် ၅၄ နှစ်မြောက်မွေးနေ့တိုင်အောင် ဘဝကိုအတ္တပရမျှတစွာ ကျင့်သုံးနိုင်ခဲ့ခြင်း “Actions speak louder than words.” “Let me live unknown and unlamented.” ဟူသော မိမိနှစ်သက်သဘောကျသည့် စံနမူနာကောင်းဘဝပုံစံကောင်းများဖြင့် ဗုဒ္ဓဓမ္မနှင့်အညီနေထိုင်ကျင့်သုံးနိုင်ခဲ့၍ ကျေနပ်ပီတိဖြစ်မိပါကြောင်း။ ချစ်သောတပည့်ဒါယကာများသာဓုအနုမောဒနာ ခေါ်ဆိုနိုင်ကြရန် ၅၄ နှစ်ပြည့်မွေးနေ့မတေိုင်ခင် ၃ ရက်ခန့်အလို၌ ဝေမျှလိုက်ရပေ၏။

သင်တို့၏ဆရာတော်အတွက် သင်တို့ ကိုယ်တိုင်ကြည်နူးဝမ်းမြောက်နိုင်ကြပါစေ။ အကုသိုလ်ပယ် ကုသိုလ်ကြွယ်၍ စိတ်ကိုလည်း ဖြူအောင်ထားနိုင်ကြပါစေ။ မိမိသည်ကား စစ်ကိုင်းရွှေဟင်္သာဆရာတော်ဘုရားကြီးကဲ့သို့ နောက်ဆုံးထွက်သက်တိုင်အောင်ဆွမ်းခံစားလျှက် ရဟန်းဘဝကိုပို၍ဖြူသည်ထက်ဖြူအောင် အရှုပ်ကင်းအောင်နေထိုင်ကျင့်သုံးသွားမည်ဖြစ်ပါကြောင်း။ ထေရဝါဒအခြေခံ သတိပဋ္ဌာန်ဝိပဿနာအကျင့်ကိုလည်း နိုင်ငံတကာသို့ပြန့်ပွားအောင် ရိုးသားစွာ professional international Buddhist monk တစ်ပါးအဖြစ် အမြဲတမ်းအရည်အသွေးမြှင့်တင်လျှက် အစွမ်းကုန်ကြိုးစားသွားမည်ဖြစ်ပါကြောင်း အဓိဋ္ဌာန်ပြုလိုက်ရပေ၏။

အားလုံးသတ္တဝါ ဘေးရန်ကွာ ချမ်းသာကိုယ်စိတ်မြဲပါစေ။
သတ္တဝါမှန်သရွေ့ တရားတွေ့ချမ်းမြေ့သာယာရှိပါစေ။
ဗုဒ္ဓမြတ်စွာ သာသနာ ကမ္ဘာအနှံ့ရောက်ပါစေ။
သူငါများစွာ တန်ဖိုးရှာ လူ့ရွာနေကြိုးနပ်ပါစေ။

ရိုးသားစွာဖြင့်
ကမ္ဘာကြီး၏မည်သည့်နေရာရောက်နေနေသင်တို့ကို အမြဲထာဝရမေတ္တာထားနေမည့်ဆရာတော်
အရှင်ကေလာသ(မဟာဂန္ဓာရုံ)