မေး။ ။ အရှင်ဘုရား အခုတလော ရေလွှမ်းမိုးတာ တောင်ပြိုတာစတဲ့ သဘာဝဘေးအန္တရာယ်တွေနဲ့ ပတ်သက်ပြီး အမြင်အမျိုးမျိုးပြောကြဆိုကြပါတယ်ဘုရား။ အရှင်ဘုရားခေတ်အမြင်ရှိသော ဆရာတော်တစ်ပါးအနေဖြင့် ဗုဒ္ဓဘာသာတရားတော်အရ တပည့်တော်တို့လည်း ဗဟုသုတရအများလည်းသိရအောင် ရှင်းပြပေးတော်မူပါဘုရား။
ဖြေ။ ။ အလွန်ကောင်းတဲ့မေးခွန်းပါ။ အချိန်ကိုက်မေးနိုင်တာအတွက်ပဲ ကျေးဇူးပင်တင်ရဦးမလားမသိဘူးနော်။ ဘုန်းဘုန်းတို့ဗုဒ္ဓဘာသာ ကျမ်းဂန်များအရဆိုရင် သတ္တဝါတို့ရဲ့သက်တမ်း အတိုးအဆုတ်ကနေစပြောရမယ်။
သက်တမ်းအတိုးအဆုတ်ဟာ ရာသီဥတုအစာအဟာရတွေနှင့်အတော်ပတ်သက်နေတာတွေ့ရတယ်။ ရာသီဥတုကောင်းကောင်းမှာနေထိုင်ရ၍ အဆီအနှစ်ပြည့်ဝသော အသီးအနှံအစာအဟာရတွေကိုစားနေရချိန်ရမှာသက်တမ်းရှည်ကြတယ်။ ရာသီဥတုမကောင်း၍ အဆီအနှစ်မကောင်းသော အစာအဟာရများကိုစားရတဲ့အခါတော့ သက်တမ်းတိုလာကြတယ်လို့ဆိုတယ်။
ဆိုခဲ့တဲ့ရာသီဥတုအဟာရကောင်းမကောင်းကလည်း သတ္တဝါတွေရဲ့ ကိုယ်အလုပ်နှုတ်အပြောမနောအကြံဆိုတဲ့ ကံသုံးပါးကောင်းမကောင်းနှင့် ဆက်စပ်နေပြန်ပါတယ်။ ဒါကြောင့်ဗုဒ္ဓဓမ္မဟာ အလွန်စိတ်ဝင်စားစရာကောင်းတယ်။ ယုတ္တိဗေဒဆန်တယ်။ အကြောင်းအကျိုးတွေကို ဆက်စပ်ကြည့်ရတယ်။ သတ္တဝါတွေပြုမူပြောဆိုကြံစီကြတဲ့ ကံတွေညံ့လာပြီဆိုရင် ရာသီဥတုဖေါက်ပြန်ပျက်စီးလာပြီး အဟာရတွေကလည်း ညံ့လာတယ်လို့ကျန်းဂန်များကဆိုပါတယ်။
အခုဒီအချက်ဟာ အလွန်စိတ်ဝင်စားစရာဖြစ်လာပြီ။ ကဲ–ဖြစ်နိုင်မဖြစ်နိုင်ဆန်းစစ်ကြည့်ရအောင်။ တစ်ကမ္ဘာလုံးဆိုရင် သိပ်ပြီးကြီးသွားလိမ့်မယ်။ မြန်မာနိုင်ငံအတွင်းမှာပဲ ဆန်းစစ်ကြည့်တာပေါ့။
မြန်မာနိုင်ငံမှာ–
(၁)။ ထေရ်ကြီးဝါကြီးဆရာတော်များအပါအဝင် ရဟန်းသံဃာနှင့်လူတွေ ကိုယ့်အလုပ်ကိုမလုပ်ဘဲ စည်းတွေဘောင်တွေကျော်လာကြရာက အပြန်အလှဆဲကြဆိုကြတဲ့ အကုသိုလ်ကာယကံဝစီကံမနောကံ ကံဆိုးများကိုနိုင်ငံနှင့်အဝန်း အားထုတ်နေကြခြင်း၊
(၂)။ ၂ နှစ်အရွယ်ကလေးငယ်ပါမကျန်ရ ကျယ်ကျယ်ပြန့်ပြန့် သက်ငယ်မုဒိန်းမှုဟူသော ကာယကံဝစီကံမနောကံ အကုသိုလ်ကံဆိုးများဖြစ်ပွားနေခြင်း၊
(၃)။ နိုင်ငံရေးဘာသာရေးလူမှုရေးပညာရေး စသည့်အရေးပေါင်းစုံတွင်လည်း မိုက်နိုင်သူများကအုပ်စုဖွဲ့၍ မိုက်နေမှန်းသိနေပါလျှက် ပြောမရဆိုမရ နိုင်ငံ၏ဝန်ထုပ်ဝန်ပိုးဖြစ်ကာ ဒုက္ခမျိုးစုံအကုန်ပေးသကဲ့သို့ဖြစ်နေခြင်း၊
(၄)။ တိုင်းပြည်တစ်ပြည်ရဲ့အဓိကကျသော တရားဥပဒေစိုးမိုးမှုသည် မြန်မာနိုင်ငံ၏အခြေအနေများစွာတွင် ကင်းမဲ့သလောက်ဖြစ်နေခြင်း စတဲ့သိသာမြင်သာသော အကုသိုလ်ကာယကံဝစီကံမနောကံ ကံဆိုးများကကျယ်ပြန့်စွာဖြစ်ပွါးနေခြင်း၊
အဲဒီလိုကံဆိုးတွေကြောင့် မြန်မာနိုင်ငံတွင် ရှေးကမဖြစ်ဘူးသော ရာသီဥတုဖောက်ပြန်ကာ ရေကြီးရေလွှမ်းမိုးမှုများ အကြီးအကျယ်ဖြစ်ပေါ်လာခြင်း၊ တောင်များကြောက်စရာကောင်းလောက်အောင်ပြိုကျခြင်း၊ တစ်ဦးနှစ်ဦးသာမဟုတ်ဘဲ ပြည်နယ်နဲ့ချီတိုင်းနှင့်ချီကာ ပျက်စီးဆုံးရှုံးမှုများဖြစ်ပေါ်နေခြင်း၊
အစားသောက်ဆိုရာတွင်လည်း စိတ်ချစရာမကောင်းလောက်အောင် အဆီအနှစ်များပျက်စီးနေခြင်း၊ မိမိစားနေသောအစားအစာသည် အားအင်ဖြစ်ရန်ထက် ကင်ဆာကဲ့သို့သော ရောကာဆိုးများကိုပင် ဖြစ်လေမည်လားဟု သံသယစိတ်ဖြင့်သတိထား၍ စားသုံးနေကြရခြင်း၊
စသည်တွေကိုကြည့်မယ်ဆိုရင် သတ္တဝါများရဲ့အကုသိုလ်ကာယကံဝစီကံမနောကံများသည် ရာသီဥတုနှင့်အစာအဟာရအပေါ် တိုက်ရိုက်သက်ရောက်မှုရှိနေကြောင်းကို အထင်အရှားတွေ့ရပေလိမ့်မည်။
ထို့ကြောင့်ထိပ်ပိုင်းခေါင်းဆောင်များကစလို့ ချစားလာဘ်စားကင်းစင်အောင်နေထိုင်ကြမည်။ ငါးပါးသီလကိုခါးဝတ်ပုဆိုးကဲ့သို့ မြဲအောင်စောင့်ထိမ်း၍ ဥပုသ်သီလရက်ရှက်စောင့်ထိမ်းကြမည်။ ရဟန်းသံဃာကို ရဟန်းသံဃာလိုသာ စစ်မှန်စွာကြည်ညိုကြကာ လိုတမျိုးမလိုတမျိုး ကောက်ကျစ်ယုတ်မာစွာ အသုံးမချဘဲနေကြမည်။
ရဟန်းသံဃာကလည်း ရဟန်းသံဃာရဲ့ပဓာနအလုပ်ကိုသာ ကြိုးစားအားထုတ်ကြပြီး သီလသမာဓိပညာ သိက္ခာသုံးပါးကိုသာ ကောင်းစွာ ဖြူစင်အောင်စောင့်စည်းကြမည်ဆိုက ရာသီဥတုဖေါက်ပြန်မှုဘေးဆိုးမှ လွတ်မြောင်နိုင်ပေလိမ့်မည်။
အစာအဟာရများလည်း အဆီသြဇာပြန်၍ ပြည့်ဝလာပေလိမ့်မည်ဟု ဒါယကာမေးသေမေးခွန်းကို ဤမျှဖြင့်သာကျေနပ်ပါရန် ပြောဆိုပါရစေ။ အခြားလုပ်စရာများကလည်းရှိနေသေးတော့ ဒီလောက်ပဲရမှာပါ။ အဆင်ပြေမယ်ထင်ပါတယ်။
မေး။ ။ အား–တင်ပါးဘုရား။ အတိုင်းထက်အလွန်အဆင်ပြေပါတယ်ဘုရား။ ဆရာတော်တို့လိုခေတ်ကိုလည်းမျှော်မြင်တတ် ကျမ်းစာကိုလည်းနိုင်နင်းတတ်မြောက်တဲ့ ဆရာတော်များရဲ့ အဖြေမျိုးဆိုတာ တပည့်တော်တို့ လူသားတွေအတွက် အလွန့်အလွန်မှအကျိုးများလှပါတယ်ဘုရား။
